काठमाडौंको त्रिवि शिक्षण अस्पताल महाराजगञ्जको कोभिड आइसीयूमा बुटवलका ६२ बर्षीय वृद्धको मृत्यु हुँदा आफन्तले डाक्टरमाथि आक्रमण गरेका छन् । 

आज (मंगलवार) दिउँसो टिचिङ अस्पतालको कोभिड आइसीयूमा कार्यरत डा. सविन भण्डारी माथि मृतकका छोराले आक्रमण गरेको महानगरीय प्रहरी परिसर काठमाडौंका प्रमुख एसएसपी अशोक सिंहले लोकान्तरलाई जानकारी दिए । 

‘६२ वर्षीय वृद्धको उपचारको क्रममा मृत्यु भएपछि आफन्तले आक्रमण गरेका थिए,’ एसएसपी सिंहले लोकान्तरसँग भने,‘अहिले मृतकका छोरा कृष्णप्रसाद गौतमलाई नियन्त्रणमा लिएका छौं ।’

निमोनिया भएका ६२ बर्षीय वृद्धलाई बुटवलबाट टिचिङ अस्पतालमा रिफर गरिएका थिए । 

टिचिङमा ‘फुट टेष्ट’ गर्दा नेगेटिभ देखिएपछि उपचार शुरु गरिएको थियो तर पछि टेकुमा गरिएको परिक्षणमा पोजेटिभ आएपछि उनलाई कोभिड कक्षको आईसीयूमा राखेर उपचार भइरहेको थियो । 

उपचारको क्रममा मृत्यु भएपछि आफन्तले हातपात गरेको महानगरीय प्रहरी परिसरका प्रवक्ता डीएसपी प्रमेस विष्टले बताए ।