नेकपा प्रचण्ड–माधव नेपाल पक्षका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीको एक मात्रै लक्ष्य आफूलाई कसरी सिध्याउने भन्ने रहेको बताएका छन् । मंगलबार राति पत्रकार ऋषि धमलालाई टेलिभिजन अन्तरवार्ता दिँदै प्रचण्डले गणतन्त्र रहिरहे आफ्नो औचित्य नै सकिने ठानेर ओली आफूविरुद्ध षडयन्त्रमा लागेको प्रचण्डले दावी गरे ।

व्यक्तिगत स्वार्थकै लागि प्रचण्डले तत्कालीन एमालेसँग पार्टी विलय गराएको आशयसहितको प्रश्न धमलाले सोधेपछि प्रचण्डले त्यसको कुनै सत्यता नभएको र त्यो सबै झूट भएको जवाफ दिए ।
प्रचण्डले भने, ‘व्यक्तिगत स्वार्थका लागि भन्ने बिलकुल सत्य होइन ।’ फेरि धमलाले सोधे, ‘तपाईँलाई प्रधानमन्त्री बन्ने व्यक्तिगत महत्वकाँक्षा जाग्यो, अनि सम्झौता गरेको हो नि त्यतिखेर ?’
जवाफमा प्रचण्डले भने, ‘होइन होइन, यो झूटो कुरा हो । बरु म प्रधानमन्त्री त केपी ओलीसँग नगरेको भए तुरुन्तै हुन्थेँ ।’

धमला फेरि बोले, अनि किन गर्नुभयो त ? प्रचण्डले थप झोक्किँदै भने, ‘मैले त देशमा राजनीतिक स्थायित्वका लागि भनिहालेँ त ? धमला फेरि आफ्नै शैलीमा बोले, ‘खोइ त राजनीतिक स्थिरता ? प्रचण्डले चर्किँदै भने, ‘भएन त, मैले गर्दा भएन त?’
प्रचण्डले आफ्नो अन्तर्वार्तामा प्रधानमन्त्रीप्रति कडा रुपमा प्रस्तुत हुँदै अदालतले पनि जनताको भावनालाई बुझेर फैसला गर्ने विश्वास व्यक्त गरे ।