हुम्लाको सदरमुकाम सिमकोटमा दिनप्रतिदिन चोरीका घटना बढ्न थालेका छन् ।

सदरमुकाम सिमकोटमा बजार गस्तीको आँखा छलेर दैनिक चोरी भएको गुनासो आउन थालेको छ ।

सिमकोट माथिल्लो बजार आसपास क्षेत्रमा दैनिक चोरी हुने गरेको यहाँका नागरिकले गुनासो गरेका छन् ।

बिहान र दिउँसोको समयमा समेत चोरी हुने गरेको छ । होटल विजयबाट सोमवार बिहान जुम्ला जिल्ला घर भएका राष्ट्रिय समाचार समिति सिञ्जाका संवाददाता उपेन्द्र न्यौपानको ४१ हजार रुपैयाँ मूल्य बरारबको मोबाइल फोन चोरी भएको छ ।

होटलमा चार्जमा राखेको समयमा आफ्नो मोबाइल चोरी भएको उनले बताए । बिहान चार्जमा राखिएको समयमा उनको रेडमी टेन प्रो मोबाइल चोरी भएको हो ।

आफू प्रेस संगठनको बैठकमा जानका लागि सिमकोट आएको र होटलमा चार्जमा राखेको समयमा चोरी भएको उनले बताए ।

सिमकोट माथिल्लो बजारमा रहेको बैंक नजिकको एक घरबाट १८ हजार रुपैयाँ नगद चोरी भएको स्थानीय कालीबहादुर बोहराले बताए । घरमा कोही नभएको मौका छोपेर रातिको समयमा चोरले घरको तालासमेत फोडेर १८ हजार रुपैयाँ नगदसहित अन्य सामान चोरी गरेको बोहराले बताए ।

यस क्षेत्रमा दैनिक लत्ताकपडा, जुत्ता लगायतका सामग्री चोरी हुने गरेको छ । सुरक्षा गस्तीले रातिको समयमा बजार गस्ती गरेको भने पनि दिउँसोको समयमा अत्यधिक चोरी हुने गरेको छ ।