जो बाइडन अबको केही घन्टामा अमेरिकाका राष्ट्रपति बन्दैछन् । आज उनको शपथग्रहण समारोह छ । 

अमेरिका ऋणमा चुर्लुम्म डुबेको बेलामा बाइडन राष्ट्रपति बन्न लागेका छन् । उनी सत्तामा आउनेबित्तिकै कोरोना महामारीसँग लड्नका लागि दुई खर्ब डलरको आर्थिक प्याकेजको घोषणा गर्न लागेका छन् । यसले देशको राष्ट्रिय ऋणलाई थप बढाउनेछ । 

महामारीसँग लड्न, मानिसहरूलाई खोप लगाउन, साना व्यापारीलाई आर्थिक सहायता दिन, गरीब र न्यून आय भएका मानिसलाई नगद सहायता उपलब्ध गराउन आर्थिक प्याकेज उपलब्ध गराइनेछ । 
 

बाइडनको आर्थिक प्याकेजलाई जोड्दा विगत नौ महिनामा आर्थिक प्याकेजमार्फत अमेरिकी सरकारले ३.५ अर्ब डलर खर्च गरिसकेको छ । 

कोरोनाका बेलामा ठूलाठूला आर्थिक प्याकेज दिए पनि विकास दर कमजोर हुँदै गएको छ । महामारीको प्रकोप पनि बढिरहेको छ र बजारमा मन्दीको अवस्था छ । 

कोरोनाका कारण साढे तीन लाखभन्दा बढी मानिस मरिसकेका छन् । दिनको चार हजार नयाँ केस आइरहेका छन् । 

बाइडनको आर्थिक प्याकेज तीतो औषधि हो र त्यो पिउनु देशको हितमा छ । महामारीका कारण अमेरिकामा गरीब जनतासँग पैसा छैन, मध्यम वर्ग चिन्तित छ र बेरोजगारी उच्च स्तरमा छ । 

आर्थिक प्याकेजले यी समस्या हटाउनेछ तर यसको उल्टो असर परेमा आर्थिक चुनौती झनै बढ्नेछ ।