प्रतिनिधि सभा विघटनविरुद्धका रिटमाथि सुनुवाइ भइरहेका बेला न्यायाधीश अनिलकुमार सिन्हा बहसमा रहेका अधिवक्तासँग झोक्किएका छन् ।

रिट निवेदकका तर्फबाट बहस गरेका अधिवक्ता कञ्चनकृष्ण न्यौपानेले प्रधानमन्त्री केपी शर्मा ओलीले कुनै पनि हालतमा प्रतिनिधि सभा पुन:स्थापना हुँदैन भन्दै हिँडेको र अदालतलाई प्रभावित पार्न खोजेको विषयमा प्रश्न उठाउँदा न्यायाधीश सिन्हा झोक्किएका हुन् ।

'सर्वोच्च अदालतमा मुद्दा विचाराधीन रहेको अवस्थामा प्रधानमन्त्री केपी शर्मा ओलीले कुनै पनि हालतमा प्रतिनिधि सभा पुन:स्थापना हुँदैन भन्दै हिँड्नुभएको छ । अदालतलाई प्रभाव पार्ने गरी, दबाब दिने गरी बोलिरहनुभएको छ,' न्यौपानेले यति भनेपछि न्यायाधीश सिन्हा झोक्किए ।

'उहाँले के बोल्नुभयो भन्ने कुरा होइन, तपाईं आफ्नो कुरा राख्नुस् । उहाँले के बोल्नुभयो भन्ने कुरामा हामी प्रभावित हुँदैनौं । तपाईंको निवेदनका विषयमा बोल्नुस्, हामी त्यसलाई एड्रेस गर्छौं‌,' सिन्हाले झोक्किँदै भने ।

साथै न्यायाधीश सिन्हाले यो बहसलाई चुनावसम्म नलम्ब्याउन पनि ध्यानाकर्षण गराए ।

'​​यो बहसलाई चुनावसम्म नलगौं । पहिला आइसकेको कुरालाई नदोहोर्‍याऊँ । नयाँ कुरा छ भने भन्नुस्, नत्र पहिला आइसकेको कुरालाई समर्थन गर्दै गए हुन्छ,' सिन्हाले भने ।

न्यायाधीश सिन्हाले यति भनेपछि अधिवक्ता न्यौपानेले सहमति जनाए ।

यससँगै आजको सुनुवाइ सकिएको घोषणा भएको छ । मुद्दालाई हेर्दाहेर्दैको अवस्थामा राखेर बाँकी सुनुवाइ भोलि हुने गरी तोकिएको छ ।

प्रतिनिधि सभा विघटनविरुद्ध परेका रिटहरूमाथि गत आइतवारदेखि प्रधानन्यायाधीश चोलेन्द्र शमशेर जबरा नेतृत्वको संवैधानिक इजलासमा निरन्तर सुनुवाइ हुँदै आएको छ ।

इजलासमा प्रधानन्यायाधीश जबराका अलावा न्यायाधीशहरू विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी छन् ।