दक्षिण कोरियामा १६ महिनाकी एक शिशुको भिडियो क्लिप खुबै चर्चामा छ । भिडियोमा स्वस्थ र सुखी बालिकाको चौडा मुस्कान र दूधे दाँतले नरम खेलौना टोकेको देखिन्छ । 

सारा देशलाई उनको नाम ज्योङ–इन कण्ठ छ ।

ती शिशुलाई पाल्ने आमाले नै हत्या गरेको आरोप छ । विगत एक दशकमा बालबालिकामाथिको ज्यादतीका घटनाहरू नाटकीय रूपमा बढिरहेको भनी बालअधिकारकर्मीहरूले यसविरुद्ध कडा कारवाही आवश्यक रहेको बताएका छन् । 

ज्योङ–इनलाई गत अक्टोबर महिनामा सौलको एक अस्पतालमा मृत घोषणा गरिएको थियो । उनलाई धर्मपुत्री बनाएका आमाबुवाले लगातार कुटपिट गर्ने गरेकाले उनको पेटमा चोटपटक र आन्तरिक रक्तश्राव भएर उनको मृत्यु भएको प्रहरीले शंका गरेको छ । 

उनको ढाडमा निकै गह्रुँगो सामग्रीले हिर्काएको राष्ट्रिय विधिविज्ञान सेवाले जनाएको छ । शिशुका हाडहरू भाँचिएको र शरीरमा अनेकौं चोटपटक देखिएको बताइएको छ । 

शिशुकी आमालाई हत्या तथा बालबालिकामाथिको दुर्व्यवहारको मुद्दामा सौल सदर्न डिस्ट्रिक्ट कोर्टमा पुर्पक्ष चलिरहेको छ । उनले बालिकामाथि दुर्व्यवहार गरेको स्वीकार गरेकी छन् र मरोस् भन्ने उद्देश्य नराखेको बताइन् । पिताविरुद्ध लापरवाहीको मुद्दा लगाइएको छ । 

यस मुद्दाकै प्रतिक्रियास्वरूप दक्षिण कोरियाली संसद्ले यसै महिनामा बालहितमा अनेकौं कानून पारित गरेको छ । घरमा बालबालिकालाई शारीरिक सजाय दिन नहुने अनि स्वास्थ्यकर्मी वा बालकल्याण संस्थाले सतर्क गराउनेबित्तिकै प्रहरीले अनुसन्धान थालिहाल्नुपर्ने कानून ल्याइएको छ । 

तर बालबालिकाको मृत्यु हुने गरी भएका दुर्व्यवहारमा लामो कारावास सजायको प्रावधानमा मतदान गरिएन किनकि वकिलहरूले त्यसको आलोचना गरे । कठोर सजायको व्यवस्था हुँदा कसूर ठहर गर्न गाह्रो पर्ने उनीहरूको तर्क छ । 

ज्योङ–इनको मृत्युपछि मानिसहरूबाट व्यापक मात्रामा शोकसन्देशहरू आइरहेका छन् । अधिकारीहरूले बालबालिकामाथिको शारीरिक क्षति र कुपोषणको प्रमाण हुँदाहुँदै पनि कारवाही नगरेकोमा उनीहरूले आक्रोश पनि पोखेका छन् । 

शिशुकी आमालाई पुर्पक्षमा लगिँदा देशका राष्ट्रपति मून जे–इनले ज्योङ–इन जस्ता बालबालिकालाई देशले बचाउन नसकेको स्वीकार गरे ।