नेपालमा पहिलो पटक महिला सैनिकले प्रतिविद्रोह तथा जंगल युद्धकला तालिम सफलतापूर्वक सम्पन्न गरेकी छन् ।

प्रतिविद्रोह तथा जंगल वारफेयर शिक्षालयमा कात्तिक १८ देखि माघ ६ गतेसम्म सञ्चालन भएको तालिममा शिक्षालयकी महिला सैनिक सिपाही राधिका थापाले सफलता हासिल गरेकी हुन् । 

उनी पहिलो पटक सहभागी भई सफलतापूर्वक तालिम सम्पन्न गर्ने पहिलो महिला सैनिक बन्न सफल भएकी नेपाली सेनाले जनाएको छ । 

सिन्धुपाल्चोकको मेलम्चीकी उनी २०६९ असार १५ गते नेपाली सेनाको सैन्य दर्जामा भर्ना भएकी थिइन् । सैन्य आधार तालिमपश्चात उनी २०७० जेठ २४ गतेबाट शिक्षालयमा कार्यरत रहेकी थिइन् ।

उनले जंगल युद्धकला तालिम सफलतापूर्वक सम्पन्न गरी साहस र जिम्मेवारीको एउटा उल्लेखनीय उदाहरण प्रस्तुत गरेकी सेनाले जारी गरेको विज्ञप्तिमा उल्लेख छ । 

३ महिनाको अवधिसम्म चल्ने अत्यन्तै कठिन तालिमको रूपमा लिइएको तालिममा जंगल नेभिगेसन, धराप निर्माण गर्ने, तथा सर्पदंश व्यवस्थापन लगायत विभिन्न सैनिक ज्ञान तथा सीपहरू सिकाइन्छ ।

उनले बिल्लादार ग्रेड–३ तथा लाइट मोटर ड्राइभिङ एण्ड मेन्टिनेन्स तालिम समेत सफलताका साथ सम्पन्न गरिसकेकी छन् ।