काठमाडौं– प्रचण्ड–माधव नेपाल समूहको नेकपाले गरेको शक्ति प्रदर्शनले गर्दा उपत्यकामा भएको सवारी व्यवस्थापनको लागि ट्राफिक प्रमुख नै सडकमा उत्रिएका छन् । 

‘आज म सडकमै सवारी व्यवस्थापनमा उत्रेको छु,’ एसएसपी जनक भट्टराईले लोकान्तरसँग भने,‘उपत्यकामा आन्दोलनले गर्दा सवारी व्यवस्थापनमा समस्या छ ।’

आज (शुक्रवार) नेकपाले गरेको विरोध जुलुसका कारणले उपत्यकाका सबै जसो सडकहरुमा ट्राफिक जाम भएको छ । 

बालाजु, नयाँ बानेश्वर, कुपण्डोल, रत्नपार्क, माइतीघर लगायतका क्षेत्रहरुका आन्दोलनकारीहरूको भिड भएकाले कारणले त्यो क्षेत्रमा सवारी आवागमन ठप्प जस्तै भएको छ । 
लगातारको आन्दोलन र जुलुसका कारणले गर्दा उपत्यकाको सडक अस्तव्यस्त देखिएको छ । 

पुष ५ गते प्रधानमन्त्री केपी शर्मा ओलीले राष्ट्रपति विद्यादेवी भण्डारीलाई संसद् विघटनको सिफारिस पछि भएको विघटनले देखिएको गतिरोधपछि उपत्यकामा विरोध, नारा जुलुस र र्‍यालीका कारणले गर्दा उपत्यकाको ट्राफिक अस्तव्यस्त भएको हो ।  

दिनदिनैको आन्दोलन र जुलुसले आफ्नो रोजीरोटीको लागि गन्तव्यमा जानु पर्ने श्रमिक र जागिरमा जानेहरू हैरानीमा परेका छन् । 

मंगलबार प्रचण्ड–नेपाल पक्षको नेकपाले गरेको शक्ति प्रदर्शन भन्दै गरेको जुलुसका कारणले एक जना युवाले अगाडि जुलुस जाँदै गर्दा आफ्नै पार्टी विरोधले गर्दा जनतालाई सास्ती दिएको भन्दै आक्रोश पोख्दै थिए ।
‘आफ्नै पार्टी–पार्टीका मान्छे लड्न हामी जनतालाई दुःख १० बजे अफिस पुग्नु पर्ने अहिलेसम्म यहीँ छु । यीनले जताबाट पनि हामीलाई दुःख दिने हुन,’ ती युवाले आक्रोश पोख्दै भने ।

अर्का एक अधबैंसे पुरुषले थपे, ‘जनताको दुःखको विषयमा, भोका नाङ्गाको विषयमा जुलुस गरेको भए पो आफ्नै कुर्सीका लागि लडेर जनतालाई दुःख दिन्छन् ।’

 ३० मिनेट जाम हुँदा २ घण्टा असर

काठमाडौंको मुख्य क्षेत्र नयाँ बानेश्वर, तीनकुने, कुपण्डोल, थापाथली, माइतीघर, पुतली सडक लगायत क्षेत्रमा ३० मिनेट अर्थात आधा घण्टा सडक ठप्प हुँदा आसपासका सडकहरुको जाम हटाउनको लागि २ घण्टा लाग्ने ट्राफिक प्रहरीले जनाएको छ ।

‘काठमाडौंको मुख्य ठाउँमा आधा घण्टा मात्रै सडक अवरुद्ध हुँदा जाम हटाउनको लागि २ घण्टा समय लाग्छ,’ महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक (एसएसपी) भट्टराईले भने ।

एसएसपी भट्टराईका अनुसार यदि त्यो क्षेत्रमा १ घण्टा भन्दा धेरै जाम भयो भने उपत्यकामा १ दिनभरी जाम हटाउन लाग्छ । 

आन्दोलन हुँदा महानगरीय ट्राफिक प्रहरीले उपत्यकामा चल्ने सार्वजनिक यातायातका साधनहरुलाई बैकल्पिक सडक प्रयोग गर्नको लागि अनुरोध गर्ने गरेको एसएसपी भट्टराईले बताए । 

‘यदि पुतलीसडकमा १ घण्टा मात्रै जाम भयो भने त्यसको असर कोटेश्वर, जडिबुटीसम्म पर्छ,’ एसएसपी भट्टराईले लोकान्तरसँग भने, ‘यस्तै काठमाडौंको मुख्य ठाउँमा छिर्ने सवारी साधनहरुको असर त्यति नै पर आसपासका क्षेत्रमा पर्ने गर्छ ।’