रुसका राष्ट्रपति भ्लादिमिर पुटिनका कट्टर विरोधी अलेक्सी नाभाल्नीका समर्थक र प्रहरीले शनिवार राति अबेरसम्म भिडन्त गरेका छन् । 
 

नाभाल्नी समर्थकहरूको रगतपच्छे भएका तस्वीर सार्वजनिक भएपछि विश्वका नेताहरूले रुसी प्रहरीको ज्यादतीको निन्दा गरेका छन् । 

शनिवार सरकारविरोधी हजारौं विरोधकर्ताहरूले ७० वटा शहरमा प्रदर्शन गरेका थिए । नाभाल्नीलाई कारावासमा राखिएकोमा विरोध गरिएको हो । उनलाई सरकारी सुरक्षाकर्मीहरूले नर्भ एजेन्टमार्फत विष दिएको आरोप छ ।
 

नाभाल्नीकी पत्नी युलिया नाभालनाया लगायत ३४ सयजनालाई पक्राउ गरिएको छ । 

प्रदर्शनकारीहरूलाई दंगा प्रहरीले प्रहरीको बस र ट्रकमा घिसार्दै लगेर कोचेका थिए । केही प्रदर्शनकारीलाई लट्ठीले ठटाइएको थियो । 

सुरक्षा अधिकारीहरूले मस्कोको पुश्किन स्क्वेयरबाट विरोधकर्ताहरूलाई हटाएका थिए । तर त्यसबाट एक किलोमिटर पर रहेको चौडा ठाउँमा हजारौं प्रदर्शनकारी भेला भएर प्रहरीलाई हिउँको डल्लोले हिर्काएका थिए ।