योगको नाम बदनाम गराउँदै कम्बोडियामा एक समूहले बीयर पिउँदै योग गरेको भिडियो सार्वजनिक भएको छ । 

कोभिडका कारण तनावमा रहेको भन्दै बीयर पिएर योग गर्ने समूह सक्रिय बनेको हो । 

राजधानी नोम पेन्हको टुबर्ड्स क्राफ्ट बीयर ब्रुअरीमा यस्तो योग गराउने गरिएको छ । 

योगको आसनमा बस्ने अनि बीयरको बोतल एक हातले समातेर घरीघरी चुस्की लगाउने भिडियो सार्वजनिक भएपछि धेरै मानिसहरू आकर्षित भएका छन् । 

‘मलाई बीयर योगा गर्न मन लाग्छ । यो परम्परागत योग जस्तो गम्भीर छैन,’ श्रेलीन बाचा नामक महिलाले बीयरको ग्लास समात्दै बताइन् । उनलाई योग आसनमा बीयरको ग्लास सम्हाल्न गाह्रो परेको थियो । 

‘हामी साथीभाइ मिलेर चीयर्स गर्छौं र बीयरको चुस्की लगाउँछौं । त्यसले मलाई खुशी पार्छ,’ उनले थपिन् । 

‘यो वास्तविक योग अभ्यास हैन । यो साथीभाइ जमघट हुने बहाना हो । मनोरञ्जनका लागि योग आसनहरूको उपयोग गरिएको हो,’ योगशिक्षक आन्नाले बताइन् । 
 

टुबर्ड्स कम्पनीको स्वामित्व बीयरप्रो इम्पोर्ट एक्सपोर्ट कम्पनीका जनरल म्यानेजर कोन्नर चेनी किर्स्चले बीयर योग दिनभरि काम गरेर थाकेका मानिसलाई मनोरञ्जनका लागि शुरू गरिएको बताए ।