लुम्बिनी प्रदेशमा कोरोना भाइरस (कोभिड–१९) विरुद्ध लगाइने खोप भोलि सोमवार आइपुग्दैछ ।

प्रदेशका ३९ हजार ४९५ जना अग्रपंक्तिमा काम गर्नेलाई पुग्ने खोप आउने लुम्बिनी प्रदेशको सामाजिक विकास मन्त्रालयले जनाएको छ । 

मन्त्रालयका प्रवक्ता डा. पुष्पराज पौडेलले अग्रपंक्तिमा रहेर काम गर्ने चिकित्सक, स्वास्थ्यकर्मी, शव बहानकर्मी, स्वास्थ्य स्वयंसेविका र सुरक्षाकर्मीलाई खोप दिइने बताए ।

पौडेलले लोकान्तरसँग भने, ‘भोलि खोप आइपुग्छ । १४ गतेदेखि १८ गतेसम्म हामीले ३९ हजार ४९५ फ्रन्टलाइनरलाई खोप लगाउदैछौं ।’ माघ १४ गतेसम्म खोप प्रदेशका १२ वटै जिल्लामा पुग्नेछ ।

लुम्बिनी प्रदेश कोरोनाको बढी प्रभावित प्रदेशमा पनि पर्छ । खोप लगाउन कसैलाई पनि दबाब दिइने छैन ।

खोप भण्डारणका लागि बुटवलमा रहेको प्रदेश स्वास्थ्य आपूर्ति व्यवस्थापन केन्द्रमा राखिने छ । संघको निर्देशन अनुसारको मापदण्डकै आधारमा खोप लगाइने प्रवक्ता पौडेलले बताए ।

खोप कार्यक्रमलाई प्रभावकारी बनाउनका लागि सामाजिक विकास मन्त्रालयले सरोकारवाला पक्षसँग छलफल गरेको छ । 

मन्त्रालयमा भएको छलफलमा यसको संवेदनशीलता र मापदण्डलाई पालना गर्न सामाजिक विकास मन्त्री सुदर्शन बरालले निर्देशन दिए । भारत सरकारले पहिलो चरणमा दिएको खोप सातै प्रदेशमा जनसंख्याका आधारमा वितरण गरिएको छ । खोप लगाउने नागरिकको नामावली संकलनका लागि कर्मचारी परिचालन गरिएको छ । 

लुम्बिनी प्रदेशमा हालसम्म संक्रमित २६ हजार ९६६, निको २६ हजार ५९, सक्रिय संक्रमित ५२२ र मृत्यु ३८२ जनाको भएको मन्त्रालयको तथ्यांकमा उल्लेख छ । प्रदेशमा आईसीयू र भेन्टिलेरटमा उपचाररत २५ जना रहेका छन् । प्रदेशमा हालसम्म २ लाख ९ हजार ८७० जनाको पीसीआर परीक्षण गरिएको छ ।