आगामी बुधवारबाट सरकारले देशभर कोभिड–१९ खोप अभियान सञ्चालन गर्ने भएको छ ।

भारत सरकारले अनुदानमा दिएको कोरोना विरुद्धको खोप बुधवारदेखि लगाउन थालिने स्वास्थ्य तथा जनसंख्या मन्त्री हृदयेश त्रिपाठीले जानकारी दिए ।

मन्त्रालयको प्रेस ब्रिफिङका क्रममा मन्त्री त्रिपाठीले खोप अभियानको शुभारम्भ बुधबार बिहान १० बजे प्रधानमन्त्री केपी शर्मा ओलीबाट हुने जानकारी दिए ।

‘कोभिड–१९ विरुद्धको संघर्षमा हामी महत्त्वपूर्ण चरणमा प्रवेश गर्दैछौं,’ उनले भने, ‘कोभिड–१९ खोप अभियानको पहिलो चरणमा प्राथमिकतामा रहेका लक्षित समूहलाई खोप प्रदान गरिने छ ।’

खोप अभियान शुभारम्भको बेला ७ वटै प्रदेशमा रहेका अस्पताल र काठमाडौंमा रहेका अस्पताल भर्चुअल विधिबाट जोडिने मन्त्री त्रिपाठीले बताए । 

‘माघ १४ गते देशभरि ७ वटै प्रदेशका ६२ अस्पताल र १२० भन्दा बढी खोप केन्द्रबाट खोप शुभारम्भ गरिने छ,’ उनले भने, ‘१८ गतेभित्र ७७ वटै जिल्लाका ३०० वटा खोप केन्द्रबाट खोप प्रदान गरिने छ ।’

पहिलो चरणको खोप अभियान शुरू गरेको बढीमा १० दिनमा सम्पन्न गरिने मन्त्री त्रिपाठीले बताए । कूल जनसंख्याको ४ लाख ३० हजार जनालाई खोप लगाउने लक्ष्य राखिएको उनले बताए ।