भारतको कोलकातामा रहेको भिक्टोरिया मेमोरियलमा भारतका प्रधानमन्त्री नरेन्द्र मोदी र पश्चिम बंगालकी मुख्यमन्त्री ममता बनर्जीको उपस्थितिमा जय श्रीरामको नारा लागेपछि राजनीति तातेको छ । 
 

यसैबीचमा पश्चिम बंगालका मन्त्री र तृणमूल कांग्रेसका नेता ज्योतिप्रिय मल्लिकले भाजपा नेताहरूलाई लक्षित गर्दै उनीहरू बाँदर भएको बताएका छन् । 
 

हावडाबाट विधायक रहेका मल्लिकले भने, ‘जुन ठाउँमा उनीहरूले नारा लगाए त्यसलाई विचार गर्दा उनीहरूलाई बाँदर नै भन्नुपर्छ । भिक्टोरिया मेमोरियलको सरकारी कार्यक्रममा जय श्रीरामको नारा किन लगाउनुपर्‍यो ? भाजपाका बाँदरहरूले जय हिन्दको नारा पो लगाउनुपर्थ्यो । भगवान् राम भाजपा वा मोदीको मात्र सम्पत्ति हुनुहुन्न । म पनि रामभक्त हुँ । तर भगवान् रामको उपयोग राजनीतिक मञ्चमा गरिनुहुँदैन ।’

उनले थपे, ‘सभ्य मानिसहरू यसो गर्दैनन् तर बाँदरहरूले यही गरे । मोदीका अगाडि हामीले पनि नारा लगाउन सक्थ्यौं तर गरेनौं ।’

आगामी विधानसभा चुनावमा जनताले यसको जवाफ दिने उनले बताए ।