ब्राजिलको पाल्मास क्लबका चार खेलाडीहरू र अध्यक्ष विमान दुर्घटनामा मारिएका छन् । 

आइतवार ब्राजिलियन कपको एक खेलमा भाग लिन जान सानो विमानमा चढेका उनीहरू दुर्घटनामा परी बितेका हुन् । 

अध्यक्ष लुकास मेरा अनि खेलाडीहरू लुकास प्राक्सेडेस, गिलेर्मे नोए, रानुले र मार्कस मोलिनारीको मृत्यु भएको हो । 

विमानचालक वाग्नरको पनि ज्यान गएको छ । 
 

पाल्मास क्लबले एक बयान जारी गर्दै बतायो, ‘विमान उड्नेबित्तिकै धावनमार्गको कुनामा दुर्घटनाग्रस्त भयो । विमानमा सवार सबैको मृत्यु भयो ।’

खेलाडीहरू लगभग ५०० माइल पर रहेको गोइयानियातिर जाँदै थिए । उनीहरूले सोमवार भिला नोभामा खेल्ने कार्यक्रम थियो । 

दुर्घटनापछि कोपा भेर्देको खेल स्थगित भएको ब्राजिली फूटबल महासंघले जनाएको छ ।