पुष्पकमल दाहाल ‘प्रचण्ड’ र माधवकुमार नेपाल अध्यक्ष रहेको नेपाल कम्युनिस्ट पार्टी (नेकपा)ले निर्वाचन आयोगलाई नेकपा आधिकारिकता विवादलाई अनावश्यक नलम्ब्याउन आग्रह गरेको छ । 

आफूहरू नै आधिकारिक भएको दाबी गर्दै प्रचण्ड-नेपाल समूहले आयोग द्विविधामा बस्नु नपर्ने बताएको हो । 

आन्दोलनका कार्यक्रम घोषणा गर्न सोमवार पार्टी केन्द्रीय कार्यालय कोटेश्वरमा आयोजित पत्रकार सम्मेलनमा प्रचण्ड–नेपाल पक्षीय नेकपाका प्रवक्ता नारायणकाजी श्रेष्ठले आयोग प्रारम्भमै सही ढंगले निर्णयमा जानु उपयुक्त हुने बताएका हुन् । 

‘हिजो गरिएको भनिएको निर्णयको आधिकारिक निर्णयप्रति जानकारी भइसकेपछि मात्र औपचारिक धारणा सार्वजनिक गरिने छ । आयोग प्रारम्भमै सही ढंगले निर्णयमा जानुपर्दथ्यो भन्ने छ,’ श्रेष्ठले भने, ‘स्वतन्त्र र निष्पक्ष ढंगले कानूनसम्मत निर्णय गर्ने संवैधानिक आयोगको निर्णय कुर्छौं । हामी आधिकारिक भएकोमा विवाद छैन, अनावश्यक ढिला गर्ने, लम्ब्याउने वा आशंका गर्नुपर्ने छैन, द्विविधामा बस्नुपर्ने छैन ।’ 

प्रवक्ता श्रेष्ठले सर्वोच्च अदालतले प्रतिनिधि सभा पुन:स्थापना गराइदिने र छिट्टै संसद्को बैठक बस्ने दिन आउने विश्वास व्यक्त गरे ।

‘प्रतिनिधि सभा विघटनविरुद्ध हाम्रो पार्टीका सांसदहरूले दर्ता गरेको रिटमाथि सर्वोच्चमा सुनुवाइ भइरहेको छ । सर्वोच्चले संविधानले  दिएको भूमिका र जिम्मेवारीअनुसार विवाद टुंग्याउनेमा विश्वस्त छौं । संविधानको मर्म, भावनाअनुसार छिट्टै निर्णय गर्ने र संसद्को बैठक सुचारू हुनेमा आशावादी छौं,’ उनले भने ।