प्रधानमन्त्री एवं नेकपा ओली समूहका अध्यक्ष केपी शर्मा ओलीले नेकपा (प्रचण्ड–नेपाल) समूहका अध्यक्ष पुष्पकमल दाहाल ‘प्रचण्ड’ले अदालतलाई धम्क्याउन खोजेको आरोप लगाएका छन् ।

उनले स्वतन्त्र अदालतलाई सम्मान गर्न प्रचण्डलाई सुझाव दिए ।

दाङमा नेकपा आली समूहले आयोजना गरेको सभालाई सोमवार सम्बोधन गर्दै ओलीले अदालतलाई धम्क्याउने काम नगर्न प्रचण्डलाई चेतावनी दिएका हुन् ।

‘एकजना नेताले अस्ति ४ दिनअगाडि बढो धुमधामसँग भने– कसैले पनि यहाँ अशान्ति चाहेको छैन । कसैले पनि अराजकता चाहेको छैन । अदालतले हाम्रै पक्षमा फैसला गर्छ भन्ने हामीलाई विश्वास छ । तर गरेन भने ! भन्या के ? कसैले अशान्ति चाहेको छैन । कसैले अराजकता खोजेको छैन रे ! अदालतले हाम्रो पक्षमा फैसला गर्नुपर्छ, नत्र... रे ? के खोजेको रहेछ उहाँहरूले ?’ ओलीले प्रश्न गरे ।

माघ ९ गते काठमाडौंमा आयोजित सभामा प्रचण्डले अदालतले प्रतिनिधि सभा विघटनलाई असंवैधानिक भन्ने विश्वास व्यक्त गरेका थिए । 

‘काठमाडौंको सडकमा उर्लेको जनसागर हाम्रो अदालत, आयोगले राम्रो देख्छ । ऐतिहासिक फैसलामा जनताको मनोभावना के छ भन्ने कुरा एउटा फ्याक्टर हुने गरेको छ,’ शुक्रवार काठमाडौंको भृकुटीमण्डपमा आयोजित सभालाई सम्बोधन गर्दै अध्यक्ष प्रचण्डले भनेका थिए ।

ओलीले प्रचण्ड–नेपाल समूहले राजनीतिक दलभन्दा पनि झगडिया जस्तो मुद्दा मामिला गर्दै हिँडिरहेको आरोप लगाए । 

‘हामीले नयाँ जनादेशका लागि ताजा जनादेशमा जाने भनेका छौं, उहाँहरू आत्तिनुभएको छ । मुद्दाका लस्कर हेर्नुस्, राजनीति गर्नुहुन्छ कि झगडा गर्नुहुन्छ ? ठीक छ, मुद्दा हाल्न पाउनुहुन्छ, अदालतलाई धम्क्याउन पाउनुहुन्न, स्वतन्त्र अदालतलाई सम्मान गर्न सिक्नुस्,’ ओलीले भने ।