निर्वाचन आयोगको निर्णयलाई नेकपा ओली समूहले गर्‍यो स्वागत

प्रधानमन्त्री केपी शर्मा ओली पक्षीय नेपाल कम्युनिस्ट पार्टी (नेकपा) सचिवालय सदस्य तथा उपप्रधानमन्त्री ईश्वर पोखरेलले निर्वाचन आयोगले गरेको निर्णय स्वागतयोग्य रहेको बताएका छन् ।

माघ २३ गते पार्टीका तर्फबाट आयोजना गर्न लागिएको जनसभाबारे जानकारी दिने उद्देश्यले पार्टी कार्यालय धुम्बाराहीमा सोमवार आयोजित पत्रकार सम्मेलनमा उनले निर्वाचन आयोगले गरेको निर्णयबाट आफूहरूले लिएको अडानलाई बल पुग्ने बताए ।


Advertisement

उनले भने, ‘हामीले निर्वाचन आयोगले गरेको निर्णयलाई स्वागत गरेका छौं ।’ उपप्रधानमन्त्री पोखरेलले अराजकता चाहनेले पार्टी फुटाउन खोजेको बताउँदै आफूहरूले कसैलाई कारबाही नगरेको बताए ।

उनले निर्वाचन आयोगको निर्णयले प्रचण्ड–नेपाल समूहले गरेको निर्णयलाई गतल साबित गरेको बताए । पोखरेलले कात्तिक २८ गते प्रचण्डले अध्यक्ष तथा प्रधानमन्त्री केपी शर्मा ओलीलाई लगाएको आरोपपत्र फिर्ता र घोषित निर्वाचनमा भाग लिने भए तत्कालका लागि नेकपामा भएको विवाद समाधान हुने बताए ।


Advertisement

पछिल्लो राजनीतिक परिस्थितिबारे जनतालाई वास्तविक जानकारी दिने उद्देश्यले नेकपा बागमती प्रदेश संगठन कमिटीले माघ २३ गते काठमाडौंमा जनसभा आयोजना गर्दैछ । पार्टीको ताजा धारणा सार्वजनिक गर्न काठमाडौंंमा जनसभा गर्न लागिएको हो ।

प्रदेश संगठन कमिटीका अध्यक्ष आनन्दप्रसाद पोखरेलले माघ २३ गते जनसभा गर्न पार्टी नेता कृष्णगोपाल श्रेष्ठको संयोजकत्वमा १ हजार १११ सदस्यीय जनसभा परिचालन कमिटी गठन गरिएको बताए ।

पत्रकार सम्मेलनमा संयोजक श्रेष्ठले माघ २३ गते ठूलो संख्यामा काठमाडौंको जनसभामा सहभागिता हुने बताए । उनले सभ्य र व्यवस्थित जनसभा गरेर देखाइने बताए । उनले फोहोर व्यवस्थापन, मर्यादित नारादेखि व्यवस्थित जनसभा गर्न २ हजार कार्यकर्ता खटिने योजना सुनाए ।

स्वयंसेवक व्यवस्थापनको नेतृत्व युवा संघका पूर्व केन्द्रीय अध्यक्ष महेश बस्नेतले गर्नेछन् । सो कमिटीमा माधव ढुंगेल, रमेश सिलवाल, रमेश पौडेल, ऐन महर, ओमकृष्ण प्रसाईलाई जिम्मेवारी तोकिएको छ ।

जनसभा सम्पन्न गराउन बागमती प्रदेश अन्तर्गतका नेकपाका केन्द्रीय सदस्य, राष्ट्रिय सभाका सदस्य, विघटित प्रतिनिधि सभाका सदस्य, प्रदेशसभा सदस्य, प्रदेश संगठन कमिटीका सदस्य, जिल्ला कमिटीका अध्यक्ष तथा सचिव सदस्य रहने जनाइएको छ ।

जनसभामा बागमती प्रदेशका १३ जिल्ला र विशेष प्रदेश कमिटीका ४ गरी १७ जिल्लाका नेता तथा कार्यकर्ताको नेतृत्वमा व्यापक जनपरिचालन गरिने संयोजक पोखरेलले बताए । विशेष प्रदेशका १७ जिल्लामा माघ १४ भित्र ५०१ सदस्यीय जनसभा परिचालन कमिटी, माघ १७ भित्र सबै पालिकामा ३०१ सदस्यीय र वडा स्तरमा १०१ सदस्यीय जनसभा परिचालन कमिटी गठन गरिनेछ ।

जनसभाअघि माघ २१ गते मोटरसाइकल र्‍याली आयोजना गरिने जनाइएको छ । सो र्‍यालीमा १० हजार सहभागी हुने दाबी गरिएको छ । गोरखापत्र दैनिकमा खबर छ ।

छापाबाट
छापाबाट

लेखकबाट थप...

कमेन्ट गर्नुहोस्