राष्ट्रिय सौन्दर्यकर्मी नेपाल कर्णाली प्रदेशले मानव सेवा आश्रम सुर्खेतमा आश्रितको केश सुधार गरेको छ ।

सौन्दर्यकर्मीको एक समूहले सोमवार आश्रममा आश्रित मानवको केश काटेर सुधार गरेको हो । 

केश काट्नुका साथै उनीहरूको व्यक्तिगत सरसफाइ गरिएको सौन्दर्यकर्मी युनियन नेपाल कर्णाली प्रदेशका अध्यक्ष प्रमी शाक्यले बताए ।

‘मानव सेवा नै सर्वोत्तम कार्य हो’ भन्ने मूल मन्त्रलाई आत्मसाथ गर्दै मानवसेवा आश्रममा आश्रितको केश सुधार गरिएको अध्यक्ष शाक्यले बताए ।

मानव सेवा आश्रम कर्णाली प्रदेशका संयोजक सृजना ओलीले सौन्दर्यकर्मीको यसप्रकारको सहयोगबाट निकै खुशी मिलेको बताइन् । ‘सडकबाट आएकाहरूलाई सेवा गर्न मानिसहरू हत्तपत्त आउँदैनन्,’ संयोजक ओलीले भनिन्, ‘यद्यपि हाम्रो सानो अनुरोधमा युनियनका प्रदेश अध्यक्षले सौन्दर्यकर्मीहरूको साथ सहयोगमा केश सुधार गरिदिनुभएको छ ।’

उनले कोरोना महामारीका कारण भएको लकडाउनले आश्रममा आश्रित आमाबुवाको केश काटेर पवित्र सहयोग गरेको भन्दै सौन्दयकर्मी युनियन नेपाललाई हार्दिक धन्यवाद दिइन् । ९ सौन्दयकर्मीले ५० आश्रित मानवको केश काटेका थिए ।