प्रधानमन्त्री केपी शर्मा ओली पक्षले नेकपा आधिकारिकता विवाद निर्वाचन आयोगले टुङ्ग्याइसकेको दाबी गरेको छ ।

शुक्रवार निर्वाचन आयोग परिसरमा पत्रकारहरूसँग कुरा गर्दै ओलीपक्षीय नेकपाका प्रभावशाली नेता सुवास नेम्वाङले नेकपा आधिकारिकता विवाद टुंगिएकाले नै आयोगले दल दर्तासम्बन्धी प्रक्रिया शुरू गरेको बताएका हुन् ।

‘नेकपा आधिकारिकता विवाद आयोगले टुंग्याइसकेको छ, त्यही आधारमा आयोगले दल दर्ताका लागि तयारी शुरू गरेको हो,’ पत्रकारहरूको एक प्रश्नको जवाफमा नेम्वाङले भने, ‘हामी आधिकारिक हौ भन्ने हाम्रो विश्वास छ ।’
दल दर्ता विवाद टुंगो लागिसकेकाले सोही जगमा उभिएर आयोगले चुनावको तयारी शुरू गरेको उनले बताए । 

नेकपा प्रचण्ड–नेपाल पक्षले भने आयोगको निर्णय आफूहरूको पक्षमा आएको दाबी गरिरहेका छन् । 

संविधान सभाका पूर्वअध्यक्ष समेत रहेका नेम्वाङले सर्वोच्च अदालतले निर्वाचनसम्बन्धी प्रक्रिया रोक्नुस् भनेर नभनेका कारण निर्वाचन आयोगले चुनावी प्रक्रिया तदारुकताका साथ अगाडि बढाउन सक्ने बताए । 

‘चुनावको मिति घोषणापछि प्रतिनिधि सभा विघटनको मुद्दा अदालतमा पुगेको छ, अदालतले स्थगन आदेश जारी गरेको छैन । निर्वाचन आयोग समेतको बुझाइ के छ भन्दा– स्थगन आदेश नगरेपछि निर्वाचनसम्बन्धी तयारी तदारुकताका साथ अगाडि बढाउनु पर्छ । अहिले कत्ति पनि ढिलाई गर्नुहुँदैन भन्ने छ । हामीले पनि आयोगलाई निर्वाचनमा लाग्नुबाहेक विकल्प छैन, तदारुकताका साथ लाग्नुस् भन्यौं,’ नेम्वाङले भने । 

नेकपा नेताहरूसँगको छलफलमा निर्वाचन आयोगले चुनाव तयारीका लागि ८४ दिन पर्याप्त हुने भन्दै तोकिएको मिति अर्थात् वैशाख १७ र २७ गते प्रतिनिधि सभा चुनाव गर्न तयार रहेको बताएको छ ।