लोकप्रिय टेलिभिजन कार्यक्रम ‘कमेडि च्याम्पियन’को दोस्रो श्रृङ्खला फागुनको २१ गतेबाट प्रशारण हुने भएको छ । पहिलो सिजन नै हिट भएपछि आयोजकले दोस्रो सिजजनको तयारी थालेको थियो, तर कोरोना महामारीले डिस्टर्ब गरेको थियो ।

यो कार्यक्रम कान्तिपुर टेलिभिजनबाट हरेक शुक्रबार र शनिबार बेलुकी ९ बजे देखि १० बजेसम्म प्रशारण हुनेछ ।

दोश्रो सिजन अन्र्तगत अडिसन राउन्ड सकिएको आयोजकतर्फबाट केकी अधिकारीले जानकारी दिइन् । उनका अनुसार अहिले धमाधम फिजिकल अडिसनको छायांकन भइरहेको छ । केकीले लोकान्तरसँग भनिन्, ‘दोस्रो सिजनलाई पहिलोमा गरेका गल्तीलाई सुधारेर थप उत्कृष्ट बनाउनेछौँ ।’

थ्रि प्रोडक्सनको प्रस्तुतिमा तयार भइरहेको यो शोमा सन्तोष पन्त, मनोज गजुरेल, ऋचा शर्मा र प्रदिप भट्टराई लगायत निर्णायकको भुमिकामा देखिनेछन् ।

उद्घोषकको जिम्मेवारी मोडल तथा अभिनेत्री रिमा विश्वकर्मालाई दिइएको छ । शो लाई केकी अधिकारी, विशाल भण्डारी, राज घिमिरे र रीमा विश्वकर्मा लगायतले मिलेर कमेडि च्याम्पियन सुरु गर्न लागेका हुन् । पहिलो शो निकै हिट भएपछि यसपटक झन् बढि सहभागीको उपस्थिती रहेको आयोजकले जनाएको छ ।