नेकपाको प्रचण्ड-नेपाल पक्षले राजनीतिक दस्तावेजका रूपमा प्रतिबद्धता पत्र लेख्ने सार्वजनिक भएको छ ।

प्रतिनिधि सभा विघटनपछि राजनीतिक रूपमा दुई चीरा भएको नेकपाको पुष्पकमल दाहाल 'प्रचण्ड' र माधवकुमार नेपाल नेतृत्व पक्षले छिटै प्रतिबद्धता पत्र सार्वजनिक गर्ने तयारी गरेको हो ।

प्रतिनिधि सभा विघटनविरुद्ध आन्दोलनमा रहेको नागरिक समाजले प्रचण्ड-नेपाल पक्षले श्वेतपत्र जारी गर्नुपर्ने माग राखेका थिए । त्यो मागलाई पनि सम्बोधन हुने गरेर प्रतिबद्धता पत्र लेख्नका लागि कार्यदलसमेत गठन भइसकेको छ ।

संघर्ष समितिका संयोजक नारायणकाजी श्रेष्ठको संयोजकत्वमा कार्यदल बनेको हो । कार्यदलमा भीम रावल, सुरेन्द्र पाण्डे, जनार्दन शर्मा, वेदुराम भुसाल लगायतका नेताहरू सदस्यका रूपमा रहेका छन् ।

सदस्य भुसालले प्रतिबद्धता पत्रमा ७/८ वटा विषय समावेश गर्न लागिएको जानकारी दिए ।

उनले लोकान्तरसँग भने, 'हाम्रो सैद्धान्तिक प्रतिबद्धता के हो, चुनावमा हामीले गरेका वाचाहरू के थिए, त्यसलाई सरकारले पूरा गर्यो कि गरेन, आजको परिस्थिति कसरी निम्तियो, अब कसरी अगाडि बढ्ने जस्ता विषयहरू समेटेर प्रतिबद्धता पत्र लेख्न लागेका छौं ।'

नागरिक समाजले माग गरेअनुसारको श्वेतपत्र जस्तै प्रतिबद्धता पत्र हुने उनले बताए । 'राजनीतिक दलको श्वेतपत्र हुँदैन,' भुसालले भने, 'हामीले आगामी कार्यक्रमहरूसमेत समेटेर सबै विषयलाई सम्बोधन गर्ने प्रयास गर्छौं ।'

उनले संघर्ष समितिको बैठकमै प्रतिबद्धता पत्रको कुरा उठेको बताए । 'माघ २८ अघि नै कार्यदल बनेको हो,' भुसालले भने, 'आन्दोलनका कार्यक्रमहरू भएकाले बैठक बस्ने समय मिलेको छैन । अब कार्यदलका साथीहरू बसेर छलफल गर्छौं ।'

नेकपाको प्रचण्ड-नेपाल पक्षले प्रतिबद्धता पत्रमार्फत जनतालाई र सडकमा अलग्गै आन्दोलन गरिरहेका शक्तिलाई आश्वस्त बनाउने रणनीति लिएको छ । यसो गरेमा संयुक्त आन्दोलनको माहोल तयार हुने अर्का एक सदस्यले लोकान्तरलाई बताए ।

'अहिले जनताले नेकपाबाट प्रतिबद्धता खोजेको छ, हामीले जनताको चाहनाअनुसार अघि बढ्छौं भनेर आश्वस्त तुल्याउनुपर्ने छ । त्यही अनुसार पत्र सार्वजनिक गरिनेछ । यसो गरेमा आन्दोलनमा आम जनताको विश्वास जित्न पनि सकिने र नागरिक समाजलाई पनि कन्भिन्स गर्न सकिने हामीले ठानेका छौं,' कार्यदलका अर्का एक सदस्यले भने ।