प्रतिनिधि सभा विघटनविरुद्धका रिटमाथिको बहस सकिएको छ ।

एमिकस क्युरीका तर्फबाट अन्तिममा वरिष्ठ अधिवक्ता गीता पाठकले राय पेश गरेपछि बहस सकिएको हो ।

बहस सकिएपछि संवैधानिक इजलासले यही फागुन १० गतेसम्म बहस नोट पेश गरिसक्न कानून व्यवसायीलाई आदेश दिएको छ । 

अर्को इजलास ११ गते मंगलवार बस्ने गरी मुद्दालाई हेर्दाहेर्दैमा राखिएको छ ।

प्रतिनिधि सभा विघटनविरुद्ध परेका रिटमाथि सर्वोच्चको संवैधानिक इजलासमा माघ ५ गतेबाट निरन्तर सुनुवाइ हुँदै आएको थियो ।

संवैधानिक इजलासमा प्रधानन्यायाधीश चोलेन्द्र शमशेर जबराको नेतृत्वमा न्यायाधीशहरू विश्वम्भरप्रसाद श्रेष्ठ, अनिलकुमार सिन्हा, सपना प्रधान मल्ल र तेजबहादुर केसी छन् ।

प्रधानमन्त्री केपी शर्मा ओलीको सिफारिशमा राष्ट्रपति विद्या भण्डारीले गएको पुस ५ गते प्रतिनिधि सभा विघटन गरी वैशाख १७ र २७ गतेका लागि निर्वाचनको मिति घोषणा गरेकी थिइन् ।

विघटनको निर्णयविरुद्ध १३ वटा रिट परेका छन् ।