कञ्चनपुरको दैजी छेला औद्योगिक क्षेत्र निर्माणले गति लिने भएपछि स्थानीय वासिन्दा खुशी भएका छन् ।

विक्रम संवत् २०५२ सालमा मनमोहन अधिकारी प्रधानमन्त्री भएका बेला औद्योगिक क्षेत्र निर्माणका लागि प्रस्ताव गरिए पनि भौतिक निर्माण कार्य अगाडि बढ्न सकेको थिएन । ९ अर्ब लागतमा ५ वर्षभित्र सो औद्योगिक क्षेत्र निर्माण हुने भएको हो । 

पूर्व सांसद नरबहादुर धामी औद्योगिक क्षेत्र स्थापनाका लागि प्रतिबद्धता अनुसार शिलान्यासको कार्यक्रम अगाडि बढेको देख्दा खुशी लागेको बताउँछन् । उनले भने, ‘विस्तृत अध्ययन प्रतिवेदन (डीपीआर) र ईआईए प्रतिवेदनको स्वीकृतिको काम सम्पन्न पश्चात निर्माणका लागि बाटो खुलेको छ ।’
 
औद्योगिक क्षेत्रका लागि बेदकोट नगरपालिकाले ९०० बिघा जग्गा उपलब्ध गराएको भए पनि हाल ४०० बिघा जग्गामा भौतिक संरचना बन्नेछ । औद्योगिक क्षेत्रको डीपीआर अनुसार १२४ प्लटमा साना, मझौला र ठूला गरी ११७ वटा उद्योग स्थापना हुनेछन्, जसबाट ३० हजार बढीले रोजगार पाउने छन् ।

यसअघि नै जनचेतना सामुदायिक वनको २०० हेक्टर र बेदकोट सामुदायिक वनको ४५० हेक्टर जग्गााको भोगाधिकार बालाजु औद्योगिक लिमिटेडको नाममा गरिएको छ । औद्योगिक क्षेत्र व्यवस्थापन लिमिटेडकोे उच्च्स्तरीय टोलीले २ पटक अनुगमन गरी विक्रम संवत् २०५२ र २०६६ सालमा बेदकोटको छेलामा औद्योगिक क्षेत्र बनाउन उपयुक्त ठहर गर्दै मन्त्रालयमा राय पेश गरेको थियो ।

२९३ बिघा जग्गामा ३०० साना, मझौला र ठूला गरी ३०० उद्योग सञ्चालन गर्न सकिने त्यही बेलाको प्रस्तावमा उल्लेख थियो । त्यसपछि आव २०७१/७२ को बजेटमा सुदूरपश्चिम क्षेत्रको विकासका लागि औद्योगिक क्षेत्र स्थापनाको कार्यलाई उच्च प्राथमिकतामा राखिएपछि अध्ययनको कार्य गरिएको थियो ।

औद्योगिक क्षेत्रलाई प्रदेशकै गौरवको योजनाका रूपमा लिइएको नेकपाका केन्द्रीय सदस्य कृपाराम राना बताउँछन् । उनले भने, ‘रोजगारीका अवसर समेत सिर्जना हुन्छन् ।’

औद्योगिक क्षेत्र पुग्ने पहुँच मार्ग निर्माणका लागि बेदकोट नगरपालिकाले काम अगाडि बढाएको छ । ‘लामो समयदेखि वन मन्त्रालयमा फायल अड्किँदा काम अगाडि बढन सकेको थिएन,’ बेदकोट नगरपालिकाका नगर प्रमुख अशोक चन्दले भने, ‘वन मन्त्रालयबाट भोगाधिकारका लागि जग्गाको स्वीकृति पश्चात वातावरणीय प्रभाव मूल्यांकनसँगै डीपीआर निर्माणको कार्य पूरा भएपछि आद्यौगिक क्षेत्र स्थापनाको कार्य अगाडि बढेको छ । औद्योगिक क्षेत्रको शिलान्यास हुने भएपछि यसले गति लिनेमा ढुक्क छौं ।’