गोरखामा एउटै घरमा सुतेका ३ जना मृत अवस्थामा भेटिएका छन् ।

बारापाक सुलिकोट गाउँपालिका–१ बारपाकस्थित धाँमी तोराङमा आइतवार राति एउटै घरमा सुतेका १ पुरुष र २ महिला मृतावस्थामा भेटिएको जिल्ला प्रहरी कार्यालयका प्रमुख प्रहरी उपरीक्षक सुरेन्द्रबहादुर गुरुङले जानकारी दिए ।
  
उनका अनुसार मृत अवस्थामा भेटिनेमा ८४ वर्षीय दिलबहादुर गुरुङ, उनकी बुहारी २२ वर्षीया आइतकुमारी गुरुङ र १३ वर्षीया नातिनी (छोरीकी छोरी) उषा गुरुङ रहेका छन् ।

सोमवार बिहान अबेरसम्म पनि घरको ढोका नखुलेपछि सँगैको छिमेकीले भित्र गएर हेर्दा तीनै जना मृत अवस्थामा देखेपछि स्थानीयले प्रहरीलाई खबर गरेका थिए । 
  
अहिले इलाका प्रहरी कार्यालय जौवारीका प्रहरी निरीक्षक ईश्वर लौडारीको नेतृत्वको टोली घटनास्थलतर्फ पठाइएको उपरीक्षक गुरुङले जानकारी दिए । घटनास्थलमा पुगेर थप अनुसन्धान नगरेसम्म घटनाबारे थप केही बताउन नसक्ने उनको भनाइ छ ।