चर्चाको २५ वर्षपछि दैजीछेला औद्योगिक क्षेत्रको काम अघि बढेको छ । पहिलो पटक बजेट विनियोजन भएको २५ वर्षपछि छेला औद्योगिक क्षेत्रको सोमवार प्रधानमन्त्री केपी शर्मा ओलीले शिलान्यास गर्दैछन् ।

२९३ बिघा क्षेत्रफलमा औद्योगिक क्षेत्र स्थापनाको कार्य शुरू हुने र पछि १ हजार बिघामा विस्तार हुने बेदकोट नगरपालिकाका मेयर अशोक चन्दले जानकारी दिए ।

‘औद्योगिक क्षेत्रका लागि बेदकोट नगरपालिकाले ९०० बिघा जग्गा उपलब्ध गराएको छ,’ उनले भने, ‘तर हाल ४०० बिघा जग्गामा भौतिक संरचना बन्नेछ । औद्योगिक क्षेत्रको डीपीआर अनुसार १२४ प्लटमा साना, मझौला र ठूला गरी ११७ वटा उद्योग स्थापना हुनेछन् । जसबाट ३० हजार बढीले रोजगार पाउने छन् ।’

शुक्लाफाँटा राष्ट्रिय निकुञ्ज जोडिएको, सालको पुनर्उत्पादित क्षेत्र र जंगली जनावरको हिँडडुल गर्ने बाटो भएको भन्दै प्रस्तावित औद्योगिक क्षेत्र स्थापना गर्न नसकिने राय वन कार्यालयले दिएको थियो । तर वन तथा वातावरण मन्त्रालय र उद्योग मन्त्रालयसँग सबै प्रमाणसहित पेश गर्दा मन्त्रालय स्तरबाटै सकारात्मक कुरा आएपछि ईआईए स्वीकृति भएको मेयर चन्दले बताए । 

औद्योगिक क्षेत्र निर्माणले गति लिएसँगै स्थानीय हर्षित भएका छन् । ‘९ अर्ब लागतमा ५ वर्षभित्र औद्योगिक क्षेत्र निर्माण सम्पन्न हुने गरी काम अघि बढेको सुनेका छौं,’ कञ्चनपुरको शुक्लाफाटाका स्थानीय करन थापाले भने, ‘हाम्रो क्षेत्रमा औद्योगिक क्षेत्र स्थापना भए यहाँको आर्थिक विकाससँगै हामीले पनि रोजगारीका अवसर पाउँछौं ।’

कञ्चनपुरमा तोकिएकै समयमा औद्योगिक क्षेत्र स्थापना भएमा सुदूरपश्चिमको मात्रै नभएर देशकै अर्थतन्त्रमा टेवा पुग्ने कञ्चनपुरको दैजीका विनोद विष्टले बताए । ‘शिलान्यास भएर मात्रै हुँदैन, द्रूतगतिमा निर्माणको काम अघि बढ्नुपर्छ,’ उनले भने ।

२०५२ सालमा तत्कालीन प्रधानमन्त्री मनमोहन अधिकारी नेतृत्वको सरकारले औद्योगिक क्षेत्र स्थापना गर्न पहिलो पटक बजेट विनियोजन गरेको थियो । औद्योगिक क्षेत्र स्थापनाका लागि यसै वर्ष वातावरणीय  प्रभाव मूल्यांकन स्वीकृत भएको थियो ।

२०६६ सालमा जिल्ला वन कार्यालयले आवश्यक जमिन उपलब्ध गराउने सहमति गरेको र जनचेतना सामुदायिक वन, बेदकोट सामुदायिक वनले पनि औद्योगिक क्षेत्र स्थापनाका लागि जग्गा उपलब्ध गराउन सहमति जनाइसकेका थिए ।

२०७५ असोजमा डिभिजन वन कार्यालय महेन्द्रनगरले वन तथा वातावरण मन्त्रालयमा दैजीछेला क्षेत्रमा औद्योगिक क्षेत्र स्थापना गर्न नसकिने पत्र पेश गरेपछि काम अलपत्र परेको थियो ।