ऊर्जामन्त्री एवं नेकपा ओली समूहका स्थायी कमिटी सदस्य टोपबहादुर रायमाझीले नयाँ सरकार बन्न नसक्ने अवस्थामा यही सरकारले निरन्तरता पाउने दाबी गरेका छन् ।

उनले मुलुक फेरि मध्यावधि निर्वाचनमा जाने सम्भावना पनि उत्तिकै रहेको बताए ।

अनेरास्ववियुले शुक्रवार काठमाडौंको आरआर क्याम्पसमा आयोजना गरेको कार्यक्रममा मन्त्री रायमाझीले सरकार बन्ने पाँचवटा सम्भावना रहेको औंल्याएका हुन् ।

प्रचण्ड–नेपाल समूहले अविश्वासको प्रस्ताव ल्याएमा त्यो असफल भयो भने देश फेरि मध्यावधि निर्वाचनमा जाने सम्भावना पहिलो नम्बरमा रहेको उनले दाबी गरे । 

‘अहिले पनि केपी ओली प्रधानमन्त्री नै हुनुहुन्छ, यो बुझिराख्नु होला, ती साथीहरूलाई सुनाउन खोजेको । सम्भावना चार-पाँचवटा छन् । पहिलो हामीलाई छाडेका साथीहरूले अरू कुनै पार्टीको नेतालाई अगाडि सारेर मानिदिएको खण्डमा त्यो आग्रह स्वीकार गरेमा सरकार बन्ने सम्भावना झिनो छ,’ रायमाझीले भने, ‘ओली र अर्को पार्टी मिलेर सरकार बन्ने पनि जब्बर सम्भावना छ । तेस्रोमा ती साथीहरूको बुद्धि फिर्‍यो भने आफ्नै घरमा बसिरहने हो भने ओलीको निरन्तरताको सम्भावना पनि छ ।’

मन्त्री रायमाझीले कार्यकर्तालाई निराश नहुन आग्रह गर्दै थपे, ‘हामीबाट अलग भएर गएका साथीहरूले सरकार बनाउने सम्भावना नभएकाले यही सरकार चलिरहन्छ, यो सरकार अगाडि बढिरहन्छ ।’

मन्त्री रायमाझीले फागुन ११ पछि परिस्थितिमा फरक आएपनि सबै सम्भावनाका ढोका खुल्न बाँकी रहेको बताए ।

‘कसैको सरकार नबने फेरि मध्यावधि चुनावमा जाने सम्भावना एक नम्बरमा छ । चिज त्यतै जाला जस्तो छ,’ रायमाझीले भने । 

मन्त्री रायमाझीले प्रतिनिधि सभा पुनःस्थापना भएकोमा लड्डु खाएको भन्दै प्रचण्ड र माधव नेपालप्रति कटाक्ष गरे । 

‘हामीलाई चकित पारेको छ, किन लड्डु खाइरहनुभएको छ, अवीर जात्रा गरिरहनुभएको छ ? के ओलीको, पोखरेलको, टोपबहादुरको संसद् बहाली भएको छैन ?’ रायमाझीले भने, ‘मानौं उहाँहरू प्रधानमन्त्री, राष्ट्रपति भइसक्नुभयो । जुन दिन लड्डु खानुभयो, आफू हुने सम्भावना छैन, तर लड्डु खानुहुन्छ ।’