महानगरीय प्रहरी प्रभाग बालकुमारीको नवनिर्मित कार्यालय भवन उद्घाटन

महानगरीय प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक हरिबहादुर पालले महानगरीय प्रहरी प्रभाग बालकुमारी ललितपुरको नवनिर्मित कार्यालय भवनको बुधवार आयोजित एक कार्यक्रमबीच उद्घाटन गरेका छन् । 

प्रहरी अतिरिक्त महानिरीक्षक पालले नवनिर्मित भवनको निरीक्षण गर्नुको साथै भवन निर्माणमा विशेष योगदान पुर्‍याउने व्यक्तित्वहरूलाई प्रशंसापत्र तथा प्रहरी कर्मचारीहरूलाई नगद पुरस्कार प्रदान गरे ।  


Advertisement

कार्यक्रममा प्रहरी अतिरिक्त महानिरीक्षक पालले नवनिर्मित भवनबाट आमनागरिकको सुरक्षा प्राप्ति र स्थानीय जनताको भरोसा केन्द्रको रूपमा स्थापित गर्न सके भवन निर्माणले सार्थकता पाउने उल्लेख गरे । 

नयाँ भवनबाट उत्कृष्ट प्रहरी सेवा प्रदान भई स्थानीय समुदायको साझेदारीमा समाजमा शान्ति सुरक्षा र सु–व्यवस्था कायम गर्ने कार्यको लागि सहयोगी सिद्ध हुने विश्वास उनले व्यक्त गरे ।

कार्यक्रमका विशिष्ट अतिथि ललितपुर महानगरपालिकाका प्रमुख चिरीबाबु महर्जनले नवनिर्मित भवनबाट प्रहरीले प्रवाह गर्ने सेवा उच्च हुनुपर्ने बताए । ललितपुर महानगरपालिकाले स्मार्ट सिटीको अवधारणा अनुरूप सुरक्षालाई मूल विम्बको रूपमा अवलम्बन गरी अगाडि बढ्नुपर्नेमा उनले जोड दिए । 

कार्यक्रममा ललितपुर जिल्लाका प्रमुख जिल्ला अधिकारी ढुण्डिप्रसाद निरौलाले नवनिर्मित भवनले प्रहरी कर्मचारीमा नयाँ ऊर्जा दिई प्रहरीको कार्यसम्पादन अझ बढी प्रभावकारी हुने उल्लेख गरे ।  

महानगरीय प्रहरी परिसर ललितपुरका प्रमुख प्रहरी वरिष्ठ उपरीक्षक किरण बज्राचार्यले स्वागत मन्तव्य व्यक्त गरेको कार्यक्रममा प्रहरी उपरीक्षक प्रज्वल महर्जनले धन्यवाद ज्ञापन तथा प्रहरी नायब उपरीक्षक ई. रोशन सारु मगरले भवन निर्माण सम्बन्धी प्रतिवेदन प्रस्तुत गरेका थिए । 

भवन राष्ट्रिय पुनर्निर्माण प्राधिकरणको १ करोड ७१ लाख १५ हजार ८८८ रुपैयाँ ६३ पैसाको लागतमा निर्माण कार्यसम्पन्न भएको हो । करीब ४२८२.४८ वर्गफिट क्षेत्रफलमा निर्मित साढे २ तले भवनमा कार्यालय प्रमुख कक्ष, व्यारेक, भान्साकोठा, थुनुवा कोठासहित जम्मा ११ वटा कोठा रहेका छन् । 

कार्यक्रममा प्रहरी नायब महानिरीक्षक, विभिन्न सरकारी कार्यालयका प्रमुख, प्रहरी वरिष्ठ अधिकृतहरू, संघसंस्थाका प्रमुख, स्थानीय तहका प्रमुखहरू, भद्रभलादमी लगायत स्थानीय समाजसेवीको उपस्थिति रहेको थियो ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्