एक महिनाअघि भारतको त्रिपुरा राज्यका मुख्यमन्त्री विप्लव देवले भारतीय जनता पार्टी नेपाल र श्रीलंकामा समेत सरकार बनाउन सक्षम रहेको दाबी गरेका थिए । 

त्यस बयानलाई नेपाल र श्रीलंका दुवै देशले कडा विरोध गरेपछि भाजपाको बेइज्जती भएको थियो । 

श्रीलंकाको निर्वाचन आयोगले कुनै पनि विदेशी दलले श्रीलंकामा चुनाव लड्नै नपाउने बताएको थियो । 

तर हालैका दिनमा श्रीलंकामा भारतीय जनता पार्टी खुलेको छ । 

कोलम्बोमा बस्ने अनि भारतीय मूलका तमिल नागरिक भेलुस्वमाी मुतुस्वामीले आईलंकाई भारतीय जनता काची नामक दल गठन गरेको घोषणा गरेका छन् । 

सबै श्रीलंकालीहरू अनि विशेषगरी तमिलहरूको सामाजिक आर्थिक विकासका लागि पार्टीले काम गर्ने उनको भनाइ छ । 

उनले शनिवार श्रीलंकाको उत्तरी भागमा रहेको जाफ्नामा पार्टी गठनको घोषणा गरेका हुन् । यस पार्टीलाई अंग्रेजीमा श्रीलंका भारतीय जनता पार्टी र सिंहलामा श्रीलंका भारतीय जनता पक्साया भनी चिनिनेछ । 

भाजपा नेता राम माधवले आइतवार बिहान एक ट्वीट गरेर श्रीलंकाको एक न्युज च्यानलको स्क्रीनशट शेयर गरेका थिए । त्यसमा मुत्थुस्वामीको परिचय श्रीलंका भारतीय जनता पार्टीका नेताका रूपमा दिइएको थियो । 

तर राम माधवले शेयर गरेको स्क्रीनशटवाला न्युज १ च्यानलले मुत्थुस्वामीलाई उद्धृत गर्दै यस दलको सम्बन्ध भाजपासँग नरहेको जनाएको छ । भारतले आफूहरूलाई सहायता गरेमा मिडियालाई खबर दिने उनको भनाइ छ ।