बेलायतका राजकुमार ह्यारी र उनकी पत्नी मेगन मार्केलले आइतवार एक टीभी अन्तर्वार्तामा ठूला खुलासा गरेका छन् । 

राजपरिवारले छोरो आर्चीलाई राजकुमार बनाउन नचाहेको किनकि उसको रंग कालो छ कि भनी परिवार डराएको बताइन् । 
 

ओप्रा विन्फ्रेसँगको कुराकानीमा मेगनले बताइन्– शाही परिवारले राजकुमार ह्यारीसँग यस विषयमा चर्चा गरेको थियो र त्यो निकै पीडादायी थियो । कुन व्यक्तिले यसरी रंगको कुरा निकालेको भनी मेगनले खुलाइनन् । 

बेलायती राजपरिवारसँग समय बिताउँदा आफूलाई आत्महत्याको विचार आउने गरेको मेगनले बताइन् । आफूलाई जेठानी केट मिडलटनले बिहेअघि रुवाएको पनि उनले बताइन् । 
 

ह्यारी र मेगनको बिहेमा उपयोग हुने कुनै कुराका विषयमा केट आक्रोशित रहेको र रुवाएको मेगनको भनाइ छ । 

राजकुमार ह्यारीले आफू र आफ्नी पत्नीमा गर्व रहेको बताए । मेगन गर्भवती हुँदा निकै खराब अवस्थाबाट गुज्रेको ह्यारीले बताए । 

शाही परिवारमा विश्वास गर्नु आफ्नो ठूलो गल्ती भएको मेगनले बताइन् । आफूलाई सुरक्षित राखिने भनी शाही परिवारले वाचा गरेको तर नगरेको उनको भनाइ छ । प्रिन्सेस डायना बाँचिरहेको भए शाही परिवारसँग क्रोधित हुने थिइन्, उनले बताइन् ।