राष्ट्रिय राजमार्गका रूपमा रहेको कान्ति राजमार्गमा झण्डै ५ किमी सडक अझै केही वर्ष कालोपत्र नहुने भएको छ ।

बर्सेनि वर्षाका कारण सडक अवरुद्ध हुने गरेकाले तत्कालका लागि कालोपत्र नगरिने कान्ति राजमार्ग योजना कार्यालयले जनाएको छ । 

अहिले तत्काल कालोपत्र नगरिने सडकमध्ये धेरै भाग ललितपुर र थोरै भाग मकवानपुरमा पर्छ । उनका अनुसार यी ठाउँ छपेली र आसपासका क्षेत्रमा रहेका योजनाका सूचना अधिकारी दिपेश रजकले बताए ।

अहिले तत्काल कालोपत्र नहुने थोरै सडक खण्ड मकवानपुरमा पनि रहेको छ । १ किलोमिटर सडक कालोपत्र गर्दा झण्डै डेढ करोड रुपैयाँ लगानी हुने भएकाले त्यो रकम खेर जान नदिन तत्काल कालोपत्र नगर्ने योजना बनाइएको हो । 

कुनै पनि ठाउँमा सडक खनेपछि केही वर्षसम्म पहिरो जाने गरे पनि केही वर्षपछि त्यहाँको माटो स्थिर भएर रहन्छ । उनले भने, ‘अबको केही वर्षमा पहिरो जान रोकिएपछि कालोपत्र गर्न सकिन्छ ।’ अहिले कालोपत्र नगरिने सडकमा पनि ग्राभेल गरिने भएकाले स्थानीयलाई आवतजावतमा समस्या नहुने योजनाका सूचना अधिकारी रजकले बताए ।

उनका अनुसार त्यो स्थानमा ग्राभेल, सडक छेउमा नाली बनाउने लगायतका अरु सबै किसिमका काम हुनेछ । यो सडकमा बर्सेनि वर्षाको समयमा सडक माथिबाट आउने पहिराका कारण सडक अवरुद्ध हुने गरेको छ । पहिले १ लेनको सडक २ लेनको बनाउँदा सडकमा पहिरो आइरहेको हो ।

सडक ट्याक खुलेको लामो समयसम्म पनि कच्ची सडकका रूपमा रहेको यो सडकमा अहिले धमाधम कालोपत्रको काम भइरहेको छ । चालू आवभित्रै त्यही ५ किमी सडकबाहेक अन्यत्र सडक कालोपत्र गरिसक्ने योजनाको लक्ष्य बताइएको छ । 

सडक २ लेन बनाइए पनि अहिलेसम्म राजमार्गमा रहेका ३ पुल १ लेनका छन् । पुललाई पनि बिस्तार गरिने योजनाले जनाएको छ । सडक विभागले गत आवमा सो सडकलाई पहिलो प्राथमिकताको सडक (पी वान) बाट राष्ट्रिय राजमार्गमा स्तरोन्नति गरेको थियो । सडक काठमाडौंलाई तराईसँग जोड्ने छोटो सडकमा पर्छ ।