कलाकार, साहित्यकार तथा समाजसेवी श्रीकृष्ण सिम्खडाको कृति ‘श्रीकृष्ण सिम्खडाका कविताहरू’ अन्तर्राष्ट्रिय नारी दिवसको अवसरमा नारी स्वास्थ्यकर्मीलाई प्रदान गरिएको छ ।

लेखक सिम्खडाले सोमवार काठमाडौंको कालिमाटीस्थित स्पार्क हेल्थ होम अस्पतालमा गएर सबै नारी स्वास्थ्यकर्मीलाई कृति दिएका हुन् ।

नारी दिवसमा सबै नारी स्वास्थ्यकर्मीप्रति सम्मान होस् भनेर कृति प्रदान गरेको लेखक सिम्खडाले जानकारी दिए ।

‘नारी दिवसको दिन आफ्नो कृति नारी स्वास्थ्यकर्मीलाई प्रदान गर्न पाउँदा नौलो प्रकारको अनुभूति भयो । सिर्जना हस्तान्तरण गरेर सम्मान प्रकट गर्न जानु नौलो भयो,’ सिम्खडाले भने, ‘बिरामीको सेवामा रहनुभएका नारी स्वास्थ्यकर्मीहरू समेत खुशी हुनुभयो ।’

हाँस्यव्यंग्य कलाकार समेत रहेका सिम्खडाले कृतिमा राजनीतिक, सामाजिक, प्रशासनिक बेथितिमाथि व्यंग्य गर्दै कविता लेखेका छन् । पुस्तक प्रदान गर्ने कार्यक्रममा सिम्खडाले कविता वाचन समेत गरेका थिए ।