नेकपा माओवादी केन्द्रका नेता जनार्दन शर्मा ‘प्रभाकर’ले सत्ता स्वार्थ  र व्यक्तिगत फाइदाको गलत मार्गमा नेतृत्व लाग्दा राजनीतिक मूल्य र आदर्श स्खलित हुन पुगेको बताएका छन् । 

मंगलवार सामाजिक सञ्जालमा एक सन्देश लेख्दै उनले नेतृत्वको वरिपरि आलोचनात्मक चेत हराएकाहरुको बाहुल्यता बढ्दै जाँदा पनि राजनीतिक मूल्य र आदर्श स्खलित हुन पुगेको टिप्पणी गरेका छन् । 

उनले लेखेका छन्, 'हामीले प्राप्त गरेको उपलब्धि समाबेश लोकतन्त्रको कार्यान्वयनको प्रारम्भमा नै संकट उत्पन्न भएको वर्तमान परिस्थितिमा राजनीति किन यति कमजोर भयो भन्ने गम्भीर प्रश्न मेरो मनमा उठिरहेको छ । आफै भित्र उत्तर खोज्दै जादा लोकतान्त्रिक मुल्य, राष्ट्रिय भावना र जनउत्तरदायित्व बाट विचलित राजनीति र नेतृत्व केन्द्रमा भेटिन्छ । परिवर्तनको मर्म अनुरुप राज्यका संरचनाहरूको पुनर्संरचना लोकतन्त्रको सुदृढीकरण गर्ने कार्यले भन्दा सत्ता स्वार्थ व्यक्तिगत फाइदाको गलत मार्गमा नेतृत्व लाग्नु बाट राजनैतिक मूल्य र आदर्श स्खलित हुन पुग्यो । नेतृत्वको वरिपरि आलोचनात्मक चेत हराएकाहरुको बाहुल्यता बढदै जानु पनि अर्को कारण हो ।'

नेता शर्माले समावेशी विकास र सामाजिक न्यायसहितको राजनीतिक आदर्श र संस्कारको पुनर्संरचना गर्न युवाहरूबीच हातेमालो गर्न आह्वान समेत गरेका छन् ।

उनले लेखेका छन्,‘राजनैतिक परिवर्तनका लागि भएको त्याग, बलिदान र नेतृत्वको योगदानको उच्च सम्मान गर्दै लोकतन्त्र, राष्ट्रियता र जनताका सपना बाट विचलित विकृत राजनीति प्रति घृणा गर्दै लोकतान्त्रिक मुल्यमा आधारित पारदर्शी जीवन व्यवहार, राष्ट्रवादी भावना र जनताप्रतिको उत्तरदायित्वपूर्ण आचरणमा प्रतिबद्ध हुँदै समावेशी विकास र सामाजिक न्याय सहितको राजनैतिक आदर्श र  संस्कारको पुनर्संरचना गर्न युवाहरू विच हातेमालो गरौं ।'