सर्वाेच्च अदालतको फैसलापछि नेकपा एमाले र माओवादी केन्द्र कायम भएर सत्ता समीकरण फेरबदल हुने चर्चाबीच प्रतिनिधिसभाको चौथो ठूलो दल जनता समाजवादी पार्टी (जसपा) मा छुट्टाछुट्टै अभ्यास शुरू भएको छ ।

एकीकरण भएर जसपा हुनुअघि रहेका राष्ट्रिय जनता पार्टी (राजपा) र संघीय समाजवादी पार्टीले छुट्टाछुट्टै भेला गरेका छन् ।

साविकका छुट्टाछुट्टै संसदीय दलको बैठकपछि मंगलबार दिउँसो संयुक्त रूपमा जसपा संसदीय दलको बैठक बस्दैछ ।

सिंहदरबारस्थित दलको कार्यालयमा दिउँसो १ बजे बस्ने गरी बोलाइएको बैठकमा सहभागी हुन साविकको संघीय समाजवादी पार्टीका सांसदहरू पुगिसकेका भए पनि राजपा सांसदहरू छुट्टै बैठकमा रहेका स्रोतले जनाएको छ ।

समाजवादी पार्टीको छुट्टै बैठक सोमवारै बसिसकेको स्रोतले जनाएको छ । राजपाको बैठक दिउँसो १२ बजे शुरू भएकाले जसपा बैठकमा सहभागी हुन ढिलाइ भएको जनाइएको छ ।

एकीकरण भइसकेको महिनौंपछि पनि सत्ता समीकरणको खेल चलिरहेका बेला साविकका पार्टीले छुट्टाछुट्टै भेला गर्नुलाई अर्थपूर्ण रूपमा हेरिएको छ । प्रतिनिधि सभाको सबैभन्दा ठूलो दल नेकपा एमालेलाई बाहिरै राखेर सरकार बनाउन जसपा निर्णायक भूमिकामा रहेको छ ।