चितवन राष्ट्रिय निकुञ्जको अमलटारी क्षेत्र अन्तर्गत निकुञ्जको मुख्य क्षेत्रमा भाले गैंडा मृतावस्था फेला परेको छ । 

निकुञ्जको शहरी क्षेत्रमा पर्ने नारायणी नदीको कलकत्ता टापुमा करीब ३० वर्षीय भाले गैंडा मृत फेला परेको हो । 

निकुञ्जका सूचना अधिकारी लोकेन्द्र अधिकारीले सेहरी क्षेत्रमा २ वटा भाले गैंडा जुधेर घाइते हुँदा एउटा गैंडा मरेको जानकारी दिए । उनका अनुसार फागुन २४ गते गैंडा मृत अवस्थामा फेला परेको थियो ।

मृत अवस्थामा भेटिएको गैंडाको खाग र खुर सुरक्षित रहेको सहायक संरक्षण अधिकृत समेत रहेका उनले बताए ।

चालू आर्थिक वर्ष २०७७/७८ मा निकुञ्जमा २२ प्राकृतिक र ४ चोरी शिकारीले गैंडा मरेका थिए ।  हरेक ५ वर्षमा हुँदै आएको राष्ट्रिय गैंडा गणना आगामी चैत ९ गतेदेखि हुने जनाइएको छ । गैंडा गणनाको तयारी शुरू भइसकेको छ । 

निकुञ्जमा पाटेबाघ समेत मृतावस्थामा फेला परेको निकुञ्जले जनाएको छ । निकुञ्जका सूचना अधिकारीका अनुसार फागुन २३ गते सौराहा क्षेत्रमा पर्ने निकुञ्जको मुख्य क्षेत्र चपरचुली खहरे खोलामा करीब ४ वर्षीय पाटेबाघ मृत अवस्थामा भेटिएको हो ।

प्राकृतिक कारणबाट मरेको पाटेबाघको लिङ्ग पहिचान हुन नसकेको निकुञ्जले जनाएको छ । चालू आव २०७७/७८ मा निकुञ्जमा मृत्यु भएको यो पहिलो पाटेबाघ हो ।