चीनकी एक महिलाले आफू जैविक तथा क्रोमोजोमिक रूपमा पुरुषका रूपमा जन्मिएको थाहा पाएकी छन् । 

गोडा मर्किएर चेकअप गराउन जाँदा उनले आफू पुरुषको रूपमा जन्मेको थाहा पाएकी हुन् । 

पूर्वी चीनको चच्याङ प्रान्तमा रहेकी पिङपिङ नामक ती व्यक्ति महिलाका रूपमा २५ वर्षसम्म रहेकी छन् र पोहोर साल उनको बिहे भएको हो । 

तर उनी कहिले पनि रजस्वला भइनन् र बिहेपछि गर्भवती पनि बनिनन् । 

गोडा मर्केर उनी फर्स्ट एफिलिएटेड हस्पिटलमा चेकजाँच गराउन पुग्दा उनको गर्भाशय नै नरहेको र महिलाको यौनांग पनि विकसित नभएको थाहा भयो । तर उनमा पुरुषको वाई क्रोमोजोम रहेको पाइयो । अर्थात् पिङपिङ जेनेटिक रूपमा पुरुष हुन् । 

उनको चिकित्सकले शरीरमा लुकेको अण्डकोष पनि भेटेनन् । त्यो खुम्चिएको हुन सक्ने चिकित्सकको अनुमान छ । 

उनका मातापिताको हाडनाता विवाह भएकाले उनको शरीर यस्तो भएको हुन सक्ने चिकित्सकको अनुमान छ । 
 

पिङपिङलाई चिकित्सकले भविष्यको जीवनको दिशा पहिल्याउनका लागि मानसिक स्वास्थ्यविद्हरूसँग सल्लाह गर्न भनेका छन् ।