काठमाडौं मेयर कप एकदिवसीय क्रिकेट प्रतियोगितामा काठमाडौं मेयर ११ ले सशस्त्र प्रहरी बलको एपीएफ क्लबसामु जीतका लागि १७८ रनको लक्ष्य प्रस्तुत गरेको छ ।

मूलपानी क्रिकेट मैदानमा एपीएफ क्लबले टस जितेर फिल्डिङ रोजेपछि काठमाडौं मेयर ११ ले ब्याटिङ गरेको हो । 

काठमाडौं मेयर ११ ले ४८ दशमलव ५ ओभरमा सबै विकेट गुमाउँदै १७७ रन बनायो । काठमाडौं मेयर ११ का लागि सन्दीप रजालीले ४८, हरिशंकर साहले ३६, विक्रम भुसालले २०, खड्ग बोहराले १३ तथा कप्तान सन्दीप लामिछानेले ११ रन बनाए । बलिङतर्फ एपीएफका अविनाश बोहरा र कमलसिंह ऐरीले ३–३ तथा वसन्त रेग्मी, शरद भेषवाकर र भुवन कार्कीले १–१ विकेट लिए ।

कीर्तिपुरस्थित त्रिवि क्रिकेट मैदानमा बाग्मती प्रदेश र त्रिभुवन आर्मी क्लबबीच अर्को खेल भइरहेको छ । बाग्मतीले टस जितेर अहिले ब्याटिङ गरिरहेको छ ।

बाग्मतीले ४६ ओभरमा ७ विकेटको क्षतिमा २४४ रन बनाएको छ । बाग्मती प्रदेशबाट खेलिरहेका पारस खड्काले शतकीय पारी खेले । खड्काले १३३ बल खेल्दै ११९ रन बनाए । उनले यस क्रममा २ छक्का र ११ चौका प्रहार गरेका छन् ।