२६ जेठ २०८३, मंगलबार
अफ्रिकी मुलुक मोजाम्बिकको उत्तरी क्षेत्रमा रहेको पाल्मा शहरमा इस्लामिक लडाकूहरूले आक्रमण गर्दा दर्जनौं मानिस मारिएको उक्त देशको रक्षा मन्त्रालयका एक प्रवक्ताले जनाएका छन् ।
एक होटललाई लडाकूहरूले कब्जामा लिएका थिए र भाग्ने क्रममा सातजना मारिएको प्रवक्ता ओमार सारांगाले बताए ।
गत बुधवारदेखि उक्त क्षेत्र इस्लामिक लडाकूहरूको कब्जामा छ ।
समुद्री किनारमा टाउको काटिएका शरीरहरू यत्रतत्र छरिएका अनि मानिसहरू लुकेर बसेको र उद्धारका लागि प्रतीक्षा गरिरहेको बताइएको छ ।
पाल्मा नजिक फ्रान्सको ऊर्जा कम्पनी टोटलको ग्यास परियोजना सञ्चालनमा छ । त्यहाँ १०० भन्दा बढी कामदार र सर्वसाधारण आमारुला पाल्मा होटलमा शरण लिन पुगेका थिए ।
पेम्बा बन्दरगाहमा मानिसहरू मालवाहक जहाज, यात्रुवाहक जहाज, टगबोट, मनोरञ्जन बोट जेबाट भए पनि भाग्न कोशिश गरिरहेको बताइएको छ ।
पाल्माको जनसंख्या ७५ हजार छ । कतिजना हताहत भए भन्ने स्पष्ट छैन ।
शहर र समुद्री किनारमा टाउको सहितका वा टाउको काटिएका शरीरहरू यत्रतत्र छरिएको कर्नेल लायोनल डाइकले बताए । उनको निजी सुरक्षा कम्पनीलाई मोजाम्बिक प्रहरीले ठेक्का दिएको छ ।
सञ्चार सुविधा अवरुद्ध भएकाले पाल्मामा के भइरहेछ भनी पुष्टि गर्न गाह्रो छ ।
बुधवार लडाकूहरूले आक्रमण थाल्दा पसल, बैंक र सेनाका ब्यारेकहरूलाई तारो बनाएका थिए ।
