चैत १७ गते मंगलवार साँझ काठमाडौंको ज्याठामा एटीएम बुथ ह्याक गरेर पैसा निकाल्न खोज्ने चिनियाँ नागरिक २९ वर्षीय वाङ सियाओलोङलाई प्रहरीले पक्राउ गर्‍यो ।

महानगरीय प्रहरी परिसर काठमाडौंका प्रमुख वरिष्ठ प्रहरी उपरीक्षक (एसएसपी) अशोक सिंहका अनुसार वाङले मंगलवार दिउँसो नेपाल आएको केही घण्टापछि नै एटीएम ह्याकको प्रयास गरेको देखिन्छ ।

‘नेपाल आउँदाको दिन नै एटीएम ह्याक गरेको प्रारम्भिक अनुसन्धानमा खुलेको छ,’ एसएसपी सिंहले लोकान्तरसँग भने, ‘अन्य कुराहरूको अनुसन्धान भइरहेको छ ।’

प्रहरीले उनी नेपाल आउनेवित्तिकै कसरी एटीएम ह्याक गरे ? उनीसँग अरू को–को संलग्न छन् भन्ने विषयको अनुसन्धान गरिरहेको बताएको छ । 

प्रहरीका अनुसार उनी त्रिभुवन अन्तर्राष्ट्रिय विमानस्थल ओर्लिनेबित्तिकै ठमेल ज्याठास्थित होटल म्यान्थसको चौथो तल्लामा रहेको रूम नम्बर ४०५ मा बसे ।

त्यहाँ केही समय बसेपछि उनी नजिकै रहेको मेगा बैंकको एटीएम ह्याक गर्नका लागि बूथमा प्रवेश गरेको देखिन्छ ।

ह्याकिङको प्रयास गर्दागर्दै प्रहरीले उनलाई पक्राउ गरेको हो ।

कसरी पत्ता लाग्यो ह्याकिङ ?

मेगा बैंकको केन्द्रीय कार्यालयबाट आफ्नो एटीएम बुथमा अस्वाभाविक गतिविधि देखिएको सूचना महानगरीय प्रहरी परिसर काठमाडौंका प्रमुख एसएसपी अशोक सिंहलाई आयो ।

जानकारी पाउनासाथ महानगरीय प्रहरी परिसरबाट डीएसपीको टोली र महानगरीय प्रहरी वृत्त दरबारमार्गको टोली परिचालन भयो ।​ साेही टोलीले उनलाई पक्राउ गरेको हो ।

यसअघि २०७६ भदौ १४ गते ६ जना चिनियाँ नागरिकलाई एटीएम ह्याक गरेर पैसा चोरी गर्दागर्दै महानगरीय प्रहरी परिसर काठमाडौंको टोलीले पक्राउ गरेको थियो ।

प्रहरीले चिनियाँ नागरिक लिन जियानमेङ, लुओ जियालेइ, झु लियानगाङ, किउ युनकिङ र चेन बिनलगायत ५ जनालाई सार्वजनिक गरेको थियो ।

त्रिभुवन अन्तर्राष्ट्रिय विमानस्थलबाट भाग्न खोजेका सु लु सिङ भदौ १५ गते पक्राउ परेका थिए । 

आरोपीले नबिल बैंकको दरबारमार्गमा रहेको एटीएम, हिमालयन बैंकको ठमेलमा रहेको एटीएम र प्रभू बैंकको कमलपोखरीमा रहेको एटीएमबाट रकम निकालेका थिए । 

पक्राउ परेका चिनियाँ नागरिकको साथबाट १ करोड २६ लाख २९ हजार ४५ नेपाली रुपैयाँ, ९ हजार १ सय ८ अमेरिकी डलर, १ हजार १ सय ९१ चिनियाँ युआन, २ सय ५० यूरो, ५ हजार क्याम्बोडीन मुद्रा र ८० हङकङ डलर फेला परेको थियो । 

नक्कली भिसा कार्ड १ सय ३२ थान, सक्कली भिसा कार्ड १८ थान, कार्ड प्रिन्टर मशिन १ थान, ल्यापटप, सामसुङ मोबाइल र डाटा कार्ड १/१ थान प्रहरीले बरामद गरेको थियो । 

यसपटक पक्राउ परेका वाङको साथबाट प्रहरीले १० वटा चाबीको झुप्पा एक थान, १० वटा एटीएम कार्ड, एप्पलको म्याकबूक, चाइनिङ पासपोर्ट लगायतका सामग्री बरामद गरेको छ ।

उनलाई महानगरीय प्रहरी वृत्त दरबारमार्गको हिरासतमा राखेर अनुसन्धान भइरहेको छ ।