नेकपा नाम विवादमा एकता नै बदर गर्ने सर्वाेच्च अदालतको फैसलाविरुद्ध नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले दायर गरेको पुनरावलोकन निवेदक पूर्ण इजलासमा पेशी चढेको छ ।

सर्वाेच्च अदालतबाट सार्वजनिक बिहीवारको पेशी सूची अनुसार प्रधानन्यायाधीश चोलेन्द्रशम्शेर जबरा, न्यायाधीश तेजबहादुर केसी र प्रकाशकुमार ढुंगानाको पूर्ण इजलासमा पेशी चढेको छ ।

बिहीवारको पेशीबाट सर्वाेच्चले पुनरावलोकन निवेदन स्वीकार गर्ने वा खारेज गर्ने आदेश दिने जनाइएको छ ।

नामको मात्रै विवाद रहेको अवस्थामा एकता नै बदर गरिनु अनुचित भन्दै प्रचण्ड पुनरावलोकनका लागि सर्वाेच्च पुगेका हुन् । नेपाल कम्युनिस्ट पार्टी (नेकपा) अध्यक्ष ऋषि कट्टेलले एकता बदर गर्नुपर्ने माग नै नगरेको प्रचण्डको तर्क छ ।

सर्वाेच्च अदालतले फागुन २३ गते फैसला सुनाउँदै नेकपा नाम ऋषि कट्टेलको हुने तथा नेकपा एमाले र माओवादी केन्द्रबीच भएको एकताबारे निर्वाचन आयोगको निर्णय बदर गर्दै साविककै पार्टी ब्युँताएको थियो ।