एमालेमा लागेका दुई प्रदेश सभा सदस्य (सांसद)लाई माओवादी केन्द्रले कारवाही गरेको छ ।

रूपन्देहीबाट निर्वाचित प्रदेश सभाको अर्थ, उद्योग, पर्यटन समितिका सभापति दधिराम न्यौपाने र गुल्मीबाट निर्वाचित दिनेश पन्थीलाई कारवाही गरेको पत्र माओवादीले आइतबार प्रदेशसभा सचिवालयमा बुझाएको हो । 

प्रदेशसभा सचिव दुर्लभकुमार पुन मगरले प्रदेशसभा सदस्यद्वय न्यौपाने र पन्थीलाई माओवादी केन्द्रले कारवाही गरेको पत्र प्राप्त भएको लोकान्तरलाई जानकारी दिए ।

उनले भने, ‘माओवादी केन्द्रका प्रमुख सचेतक तुलाराम घर्ती मगरले न्यौपाने र पन्थीलाई कारवाहीको पत्र सचिवालयमा आएको छ । उक्त पत्र आउने प्रदेशसभा बैठकमा सभामुखले पढेर सुनाउनुहुनेछ ।’ 

त्यससँगै उनीहरूको सांसद पद नियमावली बमोजिम रिक्त रहने छ । प्रदेश सभाको बैठक सोमबार बस्दैछ । 

गएको पुस ५ गते प्रधानमन्त्री केपी शर्मा ओलीले प्रतिनिधि सभा विघटन गरेपछि नेताद्वय पन्थी र न्यौपाने प्रधानमन्त्री ओलीको पक्षमा उभिएका थिए । 

सर्वोच्च अदालतले एमाले र माओवादी केन्द्र ब्युँताइदिएपछि पनि उनीहरू माओवादीमा नफर्किएर एमालेमै रहने बताउँदै आएका थिए ।

माओवादी केन्द्रले पार्टीमा फर्किन न्यौपाने र पन्थीलाई २४ घण्टे स्पष्टीकरण सोधे पनि उनीहरूले आफूहरू एमालेमै रहने निर्णयमा पुगेकाले स्पष्टीकरणको जवाफ दिनु नपर्ने बताएका थिए ।

माओवादी केन्द्रका प्रमुख सचेतक वसन्त घर्ती मगरले स्पष्टीकरणको जवाफ नआएपछि सांसदद्वय न्यौपाने र पन्थीलाई कारवाही गरिएको बताए ।

‘उहाँहरू पार्टीमा फर्किनुभएन र सोधेको स्पष्टीकरणको जवाफ पनि नआएकाले कारवाही गर्ने निर्णय गरेका हौं’ उनले भने । 

लुम्बिनी प्रदेशको कुल ८७ सांसदमध्ये माओवादी केन्द्रका २० सांसद छन् । तीमध्ये दुईजना एमालेमा लागेपछि अब माओवादी केन्द्रसँग लुम्बिनी प्रदेशसभामा १८ सांसद कायम रहनेछन् । 

न्यौपानेले आफू वैचारिक रूपमै एमालेमा लागेको भन्दै अब सांसद पद गए पनि माओवादीमा नजाने स्पष्ट पारे । 

‘म पद जोगाउन गुट चेञ्ज गरेको होइन,’ न्यौपानेले लोकान्तरसँग भने, ‘हिजो यही मुखले प्रचण्ड–नेपाल समूहको कदम गलत छ भनेर भाषण गर्दै हिँड्ने फेरि पद जोगाउनका लागि उनैतिर फर्किने ? यो हुन सक्दैन । पद गए पनि म अब माओवादीमा फर्किन्न । पद पाउनका लागि अर्को निर्वाचन पनि आउँछ ।’