गच्छदारको घरमा म्याद टाँसेको एक महिना पूरा हुँदै, उपस्थित नभए थुनछेकको प्रक्रिया अघि बढ्ने

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

भ्रष्टाचार मुद्दा खेपिरहेका नेपाली कांग्रेस उपसभापति एवं निलम्बित सांसद विजयकुमार गच्छदार हालसम्म पनि विशेष अदालतमा हाजिर भएका छैनन् ।

विशेष अदालतका प्रवक्ता पुष्पराज पाण्डेका अनुसार २०७७ साल फागुन २३ गते सुनसरीस्थित गच्छदारको घरमा म्याद टाँस गरिएको थियो।


Advertisement

म्याद टाँस भएको एक महिनाभित्रमा अदालतमा उपस्थित भएर बयान दिनुपर्ने हुन्छ । उक्त म्याद भोलि सकिँदैछ । फागुन २९ को महिना भएकाले ३० दिन भोलि मात्र पुग्ने भएको हो ।

प्रवक्ता पाण्डेका अनुसार विशेष अदालतमा मुद्दा दर्ता भएको एक महिनामै सुनसरी जिल्ला अदालतमा म्याद तामेली गर्नका लागि पत्र पठाइएको थियो।


Advertisement

‘बीचबीचमा हामीले दुईपटक औपचारिक रूपमा पत्र लेखेर नै तामेलीका लागि ताकेता समेत गरेका थियौं,’ पाण्डेले लोकान्तरसँग भने, ‘तर, कोभिडका कारण म्याद तामेली हुन सकेको थिएन । बल्ल आएर २०७७ साल चैत २३ गतेका दिन गच्छदारको सुनसरीस्थित घरदैलोमा म्याद टाँस गरिएको थियो।’

गच्छदार ३० दिनभित्र अदालतमा उपस्थित नभए कानूनबमोजिम प्रक्रिया अगाडि बढाउने पाण्डेले बताए।

‘त्यो ३० दिनको म्याद सकिन लागेको छ, उक्त समयावधिभित्र पनि उनी आफैं अदालतमा आएर बयान नगरे थुनछेकमा आदेश गर्नका लागि अदालत अगाडि बढ्नेछ,’ पाण्डेले भने, ‘आदेश गर्नका लागि अदालतको अंग त्यसपछि पूरा हुनेछ । गच्छदार अदालतमा आएर बयान नदिए पनि अदालतले मिसिलमा संलग्न प्रमाणका आधारमा आदेश गर्न सक्नेछ।’

गच्छदारले उक्त म्यादलाई बदर गराउन सक्ने कानूनी छिद्र भने रहेको नेपाल बार एसोसिएसनका पूर्व केन्द्रीय सदस्य अरुण पौडेलले बताए ।

उनका अनुसार सम्बन्धित व्यक्तिले घर/ढोकामा टाँस गरिएको कुरा आफूलाई थाहा भएन भन्दै म्याद टाँस बदर पनि गराउन सक्छन् । तर पटक-पटक उपप्रधानमन्त्रीसहित विभिन्न मन्त्रालयमा मन्त्रीको रूपमा नेतृत्व सम्हालिसकेका र  सार्वजनिक पद धारण गरेका जिम्मेवार व्यक्ति समेत भएका कारण आफैं अदालतमा आएर हाजिर भई बयान दिनु उचित हुने उनको सुझाव छ ।

‘मिडियामा नै यति समाचार आइसकेपछि मेरो विषयमा यस्तो समाचार आएको हुनाले आफैं अदालतमा हाजिर भएको छु भनेर भन्न सक्नुपर्थ्यो,’ अधिवक्ता पौडेलले बताए। 

बालुवाटारस्थित ललिता निवासको सरकारी जग्गा व्यक्तिको नाममा नामसारी गर्न भूमिका खेलेको भन्दै अख्तियार दुरुपयोग अनुसन्धान आयोगले गच्छदारसहित १७५ जनाविरुद्ध विशेष अदालतमा मुद्दा दर्ता गरेको छ।

गच्छदारविरुद्ध १ करोड ६५ लाख ७६ हजार रुपैयाँ बिगोसहित २०७६ माघ १० गते भ्रष्टाचार मुद्दा दर्ता भएको थियो। 

अजय अनुरागी
अजय अनुरागी

लेखकबाट थप...

कमेन्ट गर्नुहोस्