राष्ट्रिय जनमोर्चाका अध्यक्ष चित्रबहादुर केसी वामपन्थी शक्तिहरू जुटेर नयाँ सरकार बनाउनुपर्ने बताएका छन् ।

उनले प्रधानमन्त्री केपी शर्मा ओलीले नयाँ सरकार बनाउनको लागि बाटो सफा गरिदिनुपर्ने बताउँदै संसदमा रहेका वामपन्थी शक्तिहरूको एकताबाटै नयाँ सरकार बन्नुपर्ने बताए । 

राष्ट्रिय जनमोर्चाको चौथो राष्ट्रिय सम्मेलनपछि शुक्रवार बुटवलमा आयोजित पत्रकार सम्मेलनमा बोल्दै अध्यक्ष केसीले ओलीलाई हटाएर बामपन्थीकै नेतृत्वमा नयाँ सरकार बन्न आवश्यक रहेको दावी गरे ।

‘बाह्य शक्तिको जुट मिल्न नसक्दा मुलुकमा नयाँ सरकार गठनमा ढिलाइ भएको छ,’ अध्यक्ष केसीले भने, ‘राष्ट्रियतालाई खलल पुर्‍याउने तत्वसँग साँठगाँठ गरेर सरकार बनाउने होइन । कार्यगत एकता गरेरै भए पनि वामपन्थी नेतृत्वका नयाँ सरकार बन्नुपर्छ ।’ 

देशमा उत्पन्न पछिल्लो राजनीतिक अन्यौल तथा अस्थिरताको कारक प्रधानमन्त्री ओली नै रहेको केसीले आरोप लगाए । संसदलाई विजनेश विहिन बनाउदै विभिन्न नाटक रचेर प्रम ओलीले फेरि मध्यावधि निर्वाचतर्फ मुलुकलाई लैजाने खेलमा लागेको केसीले आरोप लगाए ।

‘यो संसदको आयु अझै २२ महिना बाँकी छ’ पूर्व उपप्रधानमन्त्री समेत रहेका नेता केसीले भने, ‘प्रधानमन्त्रीले देशलाई फेरि चुनावतर्फ धकेल्दै छन । यो कार्य गलत छ ।’ मुलुकमा पछिल्लो समय सृजना भएको अवस्थाले गणतन्त्रमाथि नै कालो बादल मडारिएको केसीले दावी गरे । 

‘बिरालोले मुसो खेलाए झै गरी विदेशीले नेपालका दललाई खेलाएका छन् । नेपाल बाह्य शक्ति केन्द्र खेल्ने थलो बन्यो । जुन मुलुकका लागि डरलाग्दो स्थिति हो,’ केसीले भने ।

जातीय र क्षेत्रीय द्वन्द्व भड्काएर मुलुकलाई अस्थिरतातर्फ धकेल्ने खेल भइरहेको अध्यक्ष केसीको भनाइ छ । 

मुलुकको लागि संघीयता सेतो हात्ती सावित भएको केसीको दावी छ ।

‘केन्द्रदेखि प्रदेशसम्म ८ वटा सरकार बनेका छन् । जहाँ अहिले नयाँ सरकार गठन विघटनको खेलमा लागेर सांसद किनबेच भइरहेका छन् । जनतालाई करको भारी बोकाएर मुलुकले संघीयता धान्दैन । संघीयता खारेजीको विकल्प छैन,' उनले भने । 

सम्मेलनबाट पुनः राष्ट्रिय जनमोर्चाको अध्यक्ष केसी नै चयन भएका छन् ।