नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपाल कम्युनिस्ट पार्टी (नेकपा) को कमाण्ड गरेर आफूले केपी ओली प्रवृत्तिविरुद्ध संघर्ष गरेको बताएका छन् ।

शनिवार पेरिसडाँडामा भएको माओवादी केन्द्र कर्णाली प्रदेश सम्पर्क समितिको भेला तथा प्रशिक्षण कार्यक्रमलाई सम्बोधन गर्दै प्रचण्डले केपी प्रवृत्तिविरुद्ध एमाले नेताहरूले समेत संघर्ष गरेको बताए ।

‘नेकपामा केपीलाई कारवाही मैले मात्रै गर्‍या हो त ? पूर्व एमाले समेतले गरेको हो,’ उनले भने, ‘ओलीमाथिको कारवाही वैधानिक छ, संविधानसम्मत छ, पार्टी एकताको कमाण्ड लिएर केपी प्रवृत्तिमाथि प्रहार गर्न सफल भएकै हो ।’

नेकपाको संसदीय दलमा बहुमत पुर्‍याएर प्रधानमन्त्रीबाट हटाउन खोज्दा सर्वाेच्च अदालतबाट एमाले र माओवादी ब्युँताउने फैसला भएको उनले बताए । 

‘संसदीय दलमा नेकपाका बहुमत सांसदले मलाई दल नेता चुनेको थियो । उता संसदीय दलको कार्यालयमा बाहिर निस्किँदा त अदालतले पार्टी २ वटा बनाइदिएछ,’ उनले भने, ‘सर्वाेच्चले गर्‍यो हामी मान्छौं भन्नुपर्ने रहेछ, मान्दैनौं भन्न नपाइने ।’