प्रधानमन्त्री केपी शर्मा ओलीले सरकारले जनतामा आशा जगाउने ढंगले काम गरिरहेको बताएका छन् ।

प्रतिकूलताका बावजुद विगत वर्षमा सरकारले जनताको विश्वास जितेको र नयाँ वर्षमा पनि केही उल्लेख्य काम गर्ने उनले बताए ।

नयाँ वर्ष २०७८ को अवसरमा बुधवार बिहान राष्ट्रका नाममा सम्बोधन गर्दै ओलीले प्रतिकुलताका बावजुद विकास निर्माणको काम अगाडि बढेको बताएका हुन् ।

उनले निर्दिष्ट लक्ष र गन्तव्यका साथ काम गरिरहेको समेत बताए । 

‘जनतामा आशा जगाउने काम गरेका छौ, जनतामा असन्तुष्टि भड्काउने प्रयास भएपनि सरकार त्यसबाट किन्चित विचलित भएन । भविष्यप्रति आशा र विश्वास जगाउने काम गर्यौँ,’ ओलीले भने ।

नयाँ वर्षको दिन पारेर ‘मेरो कित्ता’ नामक एप्स ल्याएर जनताले आफ्नो पुर्जा मोबाइलमै हेर्न सक्ने व्यबस्था गर्न लागेको बताए । यसै महिनादेखि जनकपुरदेखि नियमित रुपमा रेल संचालन हुने तथा वैशाख ११ गते काठमाडौंको धरहरा उद्घाटन गर्न लागेको ओलीले बताए । 

‘कोरोनाको असर र राजनीतिक अस्वस्थता देखा परेपनि निरर्थक वर्ष रहेछ । काठमाडौंका धारा धारमा पानी पुर्याएर दशकौँ लामो सपना पूरा भएको छ । प्रतिकुल अवस्थामा पनि अनलाइनबाट भएपनि शिक्षालाई अगाडि बढाउन सक्यौँ’ ओलीले भने । 

प्रधानमन्त्री ओलीले २०७६ सालमा सीके राउतलाई मूल धारमा ल्याएर देशबाट पृथकतावादलाई अन्त्य गरेको र २०७७ सालमा विप्लव समूहलाई राजनीतिको मूलधारमा ल्याएर हिंसाको राजनीतिको अन्त्य गरेको बताए । 

झण्डै ४५ मिनेट लामो सम्बोधन का क्रममा प्रधानमन्त्री ओलीले अरुको आलोचना भन्दापनि सरकारको कामको बचाउ गरे । अतिक्रमित नेपाली भूमि समेटेर नयाँ नक्सा जारी गर्न सक्नु नेपालीको लागि ठूलो उपलव्धी भएको ओलीले बताए ।

प्रधानमन्त्री ओलीले कोभिड १९ बाट सावधान रहन तथा बचाउका उपाय अबलम्बन गर्न आग्रह गरे । ‘सरकारले लिएको सही नीतिका कारणले हामी असफल भएनौँ, सामाजिक जनजीवन र आर्थिक क्षेत्रमा कम क्षती भयो,’ ओलीले भने । 

कोरोना संक्रमण फैलिन नदिन सुरक्षा सावधानीका उपाय अपनाउन ओलीले आग्रह गरे ।

‘कोभिड–१९ बाट सावधान रहन, यसको बचाउका उपाय गर्न, बालबालिका र जेष्ठ नागरिकलाई बचाउन सबैसँग आग्रह गर्न चाहन्छु, हामीले खोपको शुरुवात गरेका छौँ । साढे १८ लाखले खोप लगाइसकेका छन् । खोपको कार्यक्रम अगाडि बढ्दै जाला । नियन्त्रण गर्न सफल हुनेछौ,’ ओलीले भने । 

एमसीसी अनुमोदनमा ढिलाइ गरेकोमा सभामुखप्रति असन्तुष्टि

प्रधानमन्त्री ओलीले अमेरिकी सहयोग कार्यक्रम मिलेनियम च्यालेन्ज कर्पोरेशन (एमसीसी) अनुमोदनमा सहयोग नगरेको भन्दै सभामुख अग्नि सापकोटाप्रति असन्तुष्टि जनाएका छन् ।

सापकोटाको नाम नलिई ओलीले संविधान नमान्ने जिद्दी भइरहेको आरोप लगाए । 

‘एमसीसी माओवादी र कांग्रेस सरकारमा हुँदा हस्ताक्षर भएको थियो । अनुमोदनका लागि संसदमा पेश गरेका छौँ, अनुमोदनका लागि हामी त्यसको माग गरिरहेका छौँ । सरकारले प्रस्तुत गरेपछि निर्णयार्थ नगरी संविधान नमान्ने जिद्दी गर्ने काम भइरहेको छ,’ ओलीले भने । 

मुद्दा लडेर प्रतिनिधि सभाको पुनःस्थापना गर्यौँ भन्नेले एसिड आक्रमणविरुद्धको अध्यादेश पेश गर्न नदिएर अलोकतान्त्रिक काम गरेको आरोप लगाए ।