जापानका प्रधानमन्त्री योशिहिदे सुगा र अमेरिकाका राष्ट्रपति जो बाइडनबीच वाशिङटनमा यसै साता हुन लागेको शिखरवार्ताको छेको पारेर उत्तर कोरियाले क्षेप्यास्त्र प्रक्षेपण गर्ने आशंका गरिएको छ । 

उत्तर कोरियाका संस्थापक किम इल सुङको जन्मजयन्ती बिहीवार परेको छ र त्यस अवसरमा उत्तरले क्षेप्यास्त्र परीक्षण गर्ने वा नयाँ हतियार सार्वजनिक गर्ने सम्भावना छ । 
 

प्योङयाङले महत्त्वपूर्ण वार्षिकी तथा कूटनीतिक घटनाहरूमा क्षेप्यास्त्र प्रक्षेपण गर्ने गरेको छ । 

यसबाहेक किम जोङ उनको सरकारले नयाँ ब्यालिस्टिक क्षेप्यास्त्र पनडुब्बी पनि सार्वजनिक गर्ने सम्भावना रहेको दक्षिण कोरियाको योन्हाप समाचार संस्थाले खबर दिएको छ । 

बाइडन प्रशासनले पनि महिनौंसम्मको समीक्षापछि प्योङयाङका विषयमा नयाँ नीतिको घोषणा गर्ने तयारी गरेको छ । समीक्षा कहिले टुंगिन्छ भन्ने निश्चित छैन तर अर्को सातासम्ममा यो सकिने अमेरिकी अधिकारीहरूले बताएका छन् । वाशिङटन र टोक्योको धैर्यको परीक्षा लिनका लागि किम तयार देखिन्छन् । 

तर उत्तर कोरियाले उत्तेजक गतिविधि गरे पनि नगरे पनि बाइडन र सुगाबीचको शिखरवार्तामा उत्तरको चर्चा हुने सम्भावना छ । सन् १९७० र ८० को दशकमा प्योङयाङले अपहरण गरेका जापानी नागरिकहरूको सुरक्षित फिर्तीका लागि बाइडनलाई सुगाले प्रतिबद्ध बनाउन सक्ने सम्भावना छ ।