यूईएफए च्याम्पियन्स लीगको सेमीफाइनल समीकरण पूरा भएको छ । 
 

सेमीफाइनलमा रियाल मड्रिडको भिडन्त चेल्सीसँग हुने भएको छ भने म्यानचेस्टर सिटी पेरिस सेन्ट जर्माँ (पीएसजी) सँग भिड्नेछ । 
 

रियालका प्रशिक्षक जिनेदिन जिदान अविश्वसनीय रूपमा चौथोपटक च्याम्पियन्स लीग जित्नबाट तीन खेल मात्र टाढा छन् । बुधवार उनको टोलीले लिभरपूललाई हराएको हो । 

पहिलो चरणमा नै लिभरपूललाई तहसनहस बनाइसकेको रियालका लागि दोस्रो चरणमा लिभरपूलले खासै चुनौती दिन सकेन र प्रतियोगिताबाट बाहिरियो । 

उता पीएसजीले क्वार्टरफाइनलमा बायर्न म्युनिखलाई हराएर सेमीफाइनलमा स्थान बनाएको हो । पोहोर साल फाइनलमा बायर्नसँग हारेको बदला लिएको पीएसजी यसपालिको गम्भीर दाबेदार बनेको छ । 
 

पीएसजीले काउन्टर अट्याकमा देखाएको तीव्र गतिका कारण नै बार्सिलोना र बायर्नलाई ध्वस्त पार्न सकेको हो । 

यसपालि टीमको कम्बिनेसन राम्रो रहेकाले माउरिसियो पोचेट्टिनोको प्रशिक्षणमा पीएसजीले च्याम्पियन्स लीगमा कब्जा जमाउन सक्छ । 

तर पीएसजीलाई म्यानचेस्टर सिटीको चुनौती पार गर्नुपर्ने अवस्था छ । 

बोरुसिया डोर्टमन्डविरुद्ध सिटीका रियाद माहरेज र फिल फोडेनले गोल गरेर जीत दिलाए ।

सिटीको टीम बिल्डअप यस सीजनमा उत्कृष्ट छ । उसको डिफेन्स र मिडफील्ड बलियो छ भने सुपरस्टार स्ट्राइकरको कमीलाई पनि मिडफील्डले अनुभव हुन दिएको छैन । 
 

पीएसजीका कतारी साहु र सिटीका अमिर साहुहरूले आआफ्ना क्लबका लागि करोडौं रकम खर्च गरेको भए पनि च्याम्पियन्स लीग जित्न सकेका छैनन् । यसपालि यी दुवैले अवसर पाएका छन् । 

तर दुवै क्लब उत्तिकै सशक्त भएकाले अलि सावधानीपूर्वक खेल्ने सम्भावना देखिन्छ । जे भए पनि भिडन्त चाहिँ निकै रोमाञ्चक हुनेछ । 

चेल्सीको कुरा गर्दा नयाँ प्रशिक्षक टमस टुचेलले आफ्ना युवा खेलाडीहरूमा जीतको भोक जगाउन सफल भएका छन् । पोहोर साल पीएसजीलाई फाइनलसम्म पुर्‍याएर अन्तिममा निराशा हात लागेकोले टुचेललाई यसपालि प्रतियोगिता जित्ने अभिलाषा उत्कट छ । 

क्रिस्टियानो रोनाल्डोको युभेन्टसलाई समेत हराएको पोर्टो जस्तो अनप्रेडिक्टेबल क्लबलाई क्वार्टरफाइनलमा हराउनु चेल्सीको ठूलो सफलता हो । 

तर चेल्सीले च्याम्पियन्स लीगको राजा ठहरिएको रियाल मड्रिडको सामना गर्नुपरेको छ । युवा जोशलाई सही होशका साथ परिचालन गर्न टुचेल सफल भएछन् भने रियाल मड्रिडको चुनौतीलाई पनि पन्छाउन सक्छन् ।