संसद्को हिउँदे अधिवेशन अन्त्य गर्ने मन्त्रिपरिषद्को निर्णय

सरकारले प्रतिनिधि सभाको चालू हिउँदे अधिवेशन अन्त्यका लागि राष्ट्रपतिसमक्ष सिफारिश गरेको छ ।

सोमवार दिउँसो १ बजेदेखि अधिवेशन अन्त्य गर्न सिफारिश गरिएको महिला बालबालिका तथा समाजकल्याण मन्त्री जुली महतोले लोकान्तरलाई जानकारी दिइन् ।

वैशाख अन्तिम साता बजेट अधिवेशन बोलाउनुपर्ने भएकाले संसद्को बजेट अधिवेशन अन्त्य गर्ने निर्णय भएको अर्का एक मन्त्रीले जानकारी दिए ।

प्रतिनिधि सभाको बैठक मंगलवार दिउँसो १ बजेका लागि बोलाइएको थियो ।

यसअघि गत असार महिनामा पनि प्रतिनिधि सभाको बैठक तोकिएको अवस्थामा अधिवेशन अन्त्य गरिएको थियो ।

शनिवार प्रधानमन्त्री निवास बालुवाटारमा बसेको सर्वदलीय बैठकमा मंगलवारको प्रतिनिधि सभा बैठकअघि कार्यव्यवस्था परामर्श समितिको बैठक बसेर अमेरिकी आर्थिक सहयोग परियोजना मिलेनियम च्यालेञ्ज कर्पोरेसन (एमसीसी) लाई प्रक्रियामा लैजाने सहमति भएको थियो ।

सर्वोच्च अदालतको आदेशबाट पुनस्थापना भएको प्रतिनिधि सभाको हिउँदे अधिवेशन गत फागुन २३ गतेबाट शुरू भएको थियो । यो अधिवेशनमा ९ वटा बैठक बसेपनि सरकारले बिजनेस नदिँदा प्रतिनिधि सभाको बैठक प्रभावकारी बन्न सकेका थिएनन् ।