लुम्बिनी प्रदेश सरकारविरुद्ध प्रदेश सभामा अविश्वासको प्रस्ताव दर्ता गरिएपछि ३ दलीय गठबन्धन घोषणा गरिएको छ ।

नेकपा माओवादी केन्द्र, नेपाली कांग्रेस र जनता समाजवादी पार्टी (जसपा) गठबन्धनले सरकारविरुद्ध सोमवार प्रदेशसभा सचिवालयमा प्रस्ताव दर्ता गरेको हो ।

अविश्वासको प्रस्ताव दर्ता गरेपछि संयुक्त पत्रकार सम्मेलन गर्दै ३ दलीय गठबन्धनले प्रदेशलाई नयाँ ढंगबाट अगाडि बढाउनका लागि नयाँ सरकार बनाउन लागिएको साझा धारणा राखे ।

प्रस्तावित मुख्यमन्त्री तथा माओवादी केन्द्र संसदीय दलका नेता कुलप्रसाद केसीले एमालेसँगको पार्टी एकतादेखि सत्ता सहकार्य आजबाट टुंगिएको बताए । उनले अहिलेको सरकारको विकल्पमा ३ दलीय गठबन्धन बनाएर नयाँ सरकार बन्ने बताए । उनले भने, ‘सरकार अलोकतान्त्रिक बन्यो । यो गठबन्धनले नयाँ ढंगबाट प्रदेशलाई समृद्ध बनाउने छ । हामी एउटै लक्ष्य र चाहनाका साथ अगाडि बढेका छौं ।’

कांग्रेस संसदीय दलका नेता वीरेन्द्र कनौडियाले अहिले बनेको ३ दलीय गठबन्धन जनतालाई साथमा लिएर प्रदेशको विकासमा प्रतिवद्ध भएर लाग्ने बताए । ‘अहिलको सरकारले संविधान, गणतन्त्र र संघीयतालाई धर्मराउने गरायो । त्यही भएर हामी सरकारको विकल्पमा लाग्यौं । हाम्रो गठबन्धन प्रदेशमा नयाँ ढंगबाट नयाँ संस्कृतिका साथ अगाडि बढ्छ,’ उनले भने ।

जसपा संसदीय दलका नेता सहस्रराम यादवले सरकारले प्राप्त उपलब्ध खोस्ने काम गरेपछि ३ दलबीच सहकार्य गरी गठबन्धन गरिएको बताए । ३ दलीय सहमतिका साथ अविश्वासको प्रस्ताव सचिवालयमा दर्ता भएको बताए । अविश्वासको प्रस्तावको पक्षमा ४१ जना सांसदले हस्ताक्षर गरेका छन् ।