काठमाडौंमा जारी त्रिदेशीय टी-ट्वान्टी क्रिकेट शृंखलामा नेपालले मलेसियालाई ९ विकेटले पराजित गरेको छ ।

कीर्तिपुरस्थित त्रिवि अन्तर्राष्ट्रिय मैदानमा सोमवार भएको खेलमा १ सय १० रनको विजयी लक्ष्य नेपालले १२ ओभर १ बलमा १ विकेट गुमाएर पूरा गर्‍यो ।

नेपालको जीतमा ओपनर कुशल भुर्तेलले ६१ रनको अविजित पारी खेले । कुशलको यो लगातार दोस्रो अर्धशतक हो ।

नेदरल्यान्डसँगको पहिलो खेलमा पनि उनले अर्धशतक बनाएका थिए ।

अर्का ओपनर आसिफ शेख ४२ रन बनाएर आउट हुँदा दीपेन्द्रसिंह ऐरीले ६ रन जोडे । 

मलेसियाका लागि एक मात्र विकेट पवनदीप सिंहले लिए ।

यसअघि टस हारेर पहिले ब्याटिङको निम्तो पाएको मलेसियाका लागि सयेद अजिजले २७, शर्भिन मुनियान्डेले २० र शाफिक शरिफले १५ रनको योगदान गरेका थिए ।  

लगातार २ जीतजसँगै नेपाल ४ अंकसहित अंक तालिकाको शीर्ष स्थानमा छ । 

डबल लिगमा खेलाइएको खेलमा अब नेपालले पुन: एकपटक नेदरल्यान्ड र मलेसियासँग खेल्नेछ ।

लिग चरणको खेल सकिएपछि शीर्ष दुई टोली उपाधिका लागि भिड्ने छ ।