तपाईं जंगलमा लामो पदयात्रा गरेको, चराहरूले चिर्बिराएको सुनेको र रुखलाई छोएको कति भयो ?

महामारीका बेलामा मानिसहरू हिँडेको, हाइकिङ गरेको र हरियोपरियो ठाउँमा गएको देखियो । तर जंगल स्नानको अवधारणा अझै पनि नौलै छ । 

जापानमा विकसित गरिएको शिनरिन योकुलाई नेपालीमा जंगल स्नान भन्न मिल्छ । 

यो भनेको प्रकृतिको समीपमा गएर थेरापी लिने हो । जंगलमा आफ्ना पाँचै ज्ञानेन्द्रियलाई सक्रिय बनाउने र रुखको छत्रछायाँमा बस्ने काम हो । 
यसका फाइदाहरू अनेकौं छन् । 

जापानमा डा चिङ लीले सन् २००४ मा जंगल स्नानको फाइदाका बारेमा अनुसन्धान गरेका थिए । जंगल स्नान गर्दा रक्तचाप सन्तुलनमा रहने, स्ट्रेस कम हुने, मुटु स्वस्थ रहने र शरीरको रोगप्रतिरोधक क्षमता बढ्ने गर्छ । डिप्रेसन र चिन्ता पनि भाग्छ ।

प्रकृतिको समीपमा जाँदा शारीरिक र मानसिक दुवैथरी स्वास्थ्यलाई लाभ हुन्छ । 

‘मानिसहरूका लागि यो रोगको रोकथाम गराउने विधि हो,’ बेलायतमा द फरेस्ट बेदिङ इन्स्टिच्युटका सहसंस्थापक गेरी इभान्सले बताए । 

जंगलमा गएर रुखलाई अँगालो हाल्दा धेरै फाइदा हुन्छ । 

बेलायतमा जंगल स्नानले स्वास्थ्यमा गर्ने फाइदाका विषयमा पहिलो वैज्ञानिक अध्ययन सन् २०२१ को शुरूतिर गरिएको थियो । यसले रोगीलाई परामर्श दिँदा जंगल जानका लागि स्वास्थ्यकर्मीहरूलाई प्रेरणा दिएको छ ।